Diyarname
Hejmara nû ya kovara Tîrojê derket. Di dosyaya kovarê de mijara wergera bi kurdî bi navê "Werger lê çawa?" tê nîqaşkirin.

Kovara Tîrojê bi hejmara xwe ya rezber û kewçêrê 40'emîn hejmara xwe jî derxist. Kovar digel nivîsên cur bi cur di her hejmarê de dosyayeke jî amade dike û di vê hejmarê de dosyaya xwe li ser wergerê amade kiriye. Di dosyayê de Dawud Rêbiwar, Fehim Işik, Dilawer Zeraq, Cihan Roj, Husên Duzen, Mukit Arslan, Jan Dost û Rifat Arya di nivîsên xwe de fikrên xwe anîne ziman.
Dawud Rêbiwar li ser "Di pêşketina ziman, çand û ramanê de rola wergerê" sekiniye, ji mînakên Tirkiyeyê hin agahiyên girîng ên li ser wergerê pêşkêş kiriye û di dawiyê de jî îdîayeke nû avêtiye holê, "Kurd li kurdî venegerin werger nikare tişteke bike."
Nivîskar Dilawer Zeraq meseleya "Em werdigerînin an werdigerin?" pêşkêş kiriye, Jan Dost jî li ser "Pêşengê wergera bi kurdî Mela Mehmûdê Beyazîdî" û wergera yekemîn sekiniye.
Rifat Arya di nivîsa xwe ya bi navê "Çend gotin li ser wergerê" de wisa dibêje, "Wergêr, wexta ku bi zimanê dereke (biyanî) re rû bi rû dimîne, divê ev pirs bêne bala wî; Nivîskar çi dibêje? Nivîskar qesta çi dike? Û Ew vê tiştê çawa vedibêje?" Piştre jî li bersiva van pirsan geriyaye. Mukit Aslan jî di dosyayê de çend notên li ser ji tirkî wergera ji bo kurdî pêşkêş kiriye.

Nivîskar Şeyhmus Diken di nivîsa bi sernavê "Dengê ji Qefleyê maye Aramê Dîkran" de li ser hunermendê mezin nivîsa xwe nivîsandiye. Hunermend Mehmet Atli bi sernavê "Layiqbûna Aramê Dîkran" nivîseke nivîsandiye. Her wiha kesên wekî Rojîn, Pakrat Estukyan, Şivan Perwer, Vedat Yildirim, Serhat Karakaş jî dîtinên xwe li ser Dîkran anîne ziman. Nivîskar Edîb Polat jî di nivîsa xwe ya bi navê "Nivîskariya bi kurdî...Lê çawa?" de li ser kesên ku heta niha bi tirkî nivîsandine dê çawa vegerin kurdî sekiniye.
Bariş Yildirim û H. Neşe Ozgun jî li ser bendavên ku li Mûnzûrê dê bêne çêkirin û li ser jiyana wir nivîs nivîsandine.

Di beşa hevpeyvînan de jî bi nivîskar Faik Bulut re li ser hewlên çareserkirina pirsgirêka kurd hevpeyvîneke hatiye kirin. Bulut dibêje, "Nêzîktêdayîna 'Pirsgirêka kurd wekî terorê ye' têk çû".

Tevfik Taş, Bariş Avşar, Arjen Arî, Nûra Cewarî, Prof. Cem Somel, Yusuf Karataş, Selim Temo, Cuma Boynukara, Rinda Deniz, Tosinê Reşîd, Fewzî Bîlge, Kemal İnal, Dr. Omer Uluçay, Ali Arif, Cihan Roj, Şengul Ogur bi nivîsên xwe beşdarî kovarê bûne.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.