Amed

Lîstika "Çîrokeke Zivistanê" ku derhêneriya wê Haldun Dormen kir û lîstikvanên Şanoya Şaredariya Bajarê Mezin a Amedê têne listin derkete ser dikê. Piştî pêşkêşkirina promiyera lîstikê derhênerê tirk Dormen derket ser dikê û bi gotina "Şevbaş" silav li temaşevanan kir. Şaredarê Bajarê Mezin ê Amedê Osman Baydemîr jî ji ser naveroka lîstikê re got: "Befra 70-80 salan dihele."

Şanogerê navdar Haldun Dormen bi gotina "Ji bo kedeke bixim nav aştiyê" dest bi rê ve birina lîstikê kiribû. Dormen digel ku bi kurdî nedizanî jî ji ber vê gotina xwe lîstik bi rê ve bir û lîstik duh êvarê li Şanogeha Bajarê Mezin a Amedê derket pêşberî temaşevanan. Salona mişt tije bû. Di nav kesên ku li lîstikê temaşe kirin de Hevserokê DTP'ê Gultan Kişanak, hevserokê DTP'eya ku hate girtin Ahmet Turk, mebûsa berê ya DTP'ê Aysel Tugluk, mebûsa BDP'ê Sabahat Tuncer, Paliyê Amedê Huseyin Avni Mutlu, mebûba berê ya DEP'ê Leyla Zana, Şaredarê Bajarê Mezin ê Amedê Osman Baydemir, Aktîvîsta Mafên Mirovan parêzer Reyhan Yalçindag, Gulten Kaya, endamên Koma Aştiyê, rojnameger Ece Temelkuran, Devrim Sevimay, Mujgan Halis hebûn.

Şanoger Dormen dema derket ser dikê bi gotina "Şevbaş" silav li temaşevanan kir û got: "Ev bûyera herî bi heyecan, herî xweş a jiyana min e. Ev lîstik digel Kemal Uzun me ji bo Kemal Sunal nivîsî. Kemal Sunal bi navê 'Deli Deli Kupeli' fîlmê vê kişand. Me ji berhema Hasan Fehmi Başkurt adapte kir. Me piştî adapteyî pêşkeşî hinan kir, di dawiyê de Selçuk Yondem wekî muzîkal lîst. Gelek serketî bû. Lîstika ku îro hate lîstin jî gelek baş bû, kadroyeke baş ew derşist ser dikê. Ez gelek kêfxweş im, baş e ku we ev firsend daye min."

Şaredarê Bajarê Mezin ê Amedê Osman Baydemîr jî bi kurdî û tirkî axivî, li ser navê gelê Amedê sipasî li Haldun Dormen kir, bal kişand ser "Çîroka Zivistanê" ku têde berf dihele û got: "Berfa 70-80 salan a li vî welatî dihele. Bihara ku emê bi hev re bilîzin tê. Vaye yek ji pirên aştiyê jî ji aliyê Haldun Dormen û lîstikvanên Şaredariya Bajarê Mezin ve hate çêkirin. Ez sipasiya xwe pêşkêşî hemûyan dikim. Zor sipas."

Dûre Baydemîr gotina, "Em heta bijîn parlementerên dilê me Ahmet Turk, Aysel Tugluk û Leyla Zana li cem me ne, hevala jiyanê ya Ahmet Kaya Gulten Kaya li vir e, ez bawer im rihê Ahmet Kaya îşev bi me re bû" anî ziman û gazî kesên protokolê kir ku kulîlkan pêşkêşî lîstikvanan bikin. Walî Mutlu, mebûs û endamên Koma Aştiyê bi hev re kulîlk pêşkêşî lîstikvanan kirin. Piştî lîstikê kokteyleke hate li dar xistin.

***

Nûçeyên eleqedar:

- "Çîroka zivistanê" bi kurdî tê lîstin

- "Zimanê Çiya" li Amedê hat ziman