Diyarname

Pirtûka Mehmûd Yeşîl bi navê ‘Desteyek ji çîroka jiyana min’ derket. Di pirtûkê de hin bîranînên pêncî salên dawî hene.

Mehmûd Yeşîl di sala 1938’an de li Garisiya Şêxa ya Farqîna Amedê hatiye dinê. Ew ji “malbateke dîndar û welatparêz e”. Gelek bûyerên ku li Bakur derbas bûne de ew jî têde bûye û ew bûyer di pirtûkê de cih girtine. Ew wisa dibêje, “Ez bi çîrok û serpêhatiyên Serhildana Şêx Seîd û Qetlîama Erzeromê mezin bûm. Min gelek tişt ji devê yekemîn; ji dê, bav û apanên xwe yên ku şahid û beşdarên van her du bûyeran bûn, bihîstine. Ez, helbest û berhemên Melayê Cizîrî, Feqiyê Teyran, Siyahpûş, Ehmedê Xanî ji zarokatiyê ve ji malbata xwe hîn bûm. Ev bûn hîmên kurdayetiya min. Helwesta min a siyasî li ser vî hîmî ava bû. Di salên 1950’yî de di hucreyên feqiyan de êdî min fikrên kurdîtiya xwe bi yên der û dora xwe re par ve dikirin.”

Mehmûd Yeşîl xwendina xwe di medreseyan de temam dike. Ew ji malbata şêxan, mirûdên wî û malbata wî hene. Di pirtûka hatiye nivîsandin de li ser vê yekê jî bîranîn hatine bi cih kirin.

Ew, ji bo TÎP’ê dixebite, di xwepêşandanên Dogu Mîtînglerî (Mîtîngên Rojhilat) de û di avakirina DDKO’ya Farqînê de cih digire; qala têkiliya xwe û Dr. Şivan dike; hin bûyerên ji salên 1970’ê, 1980, salên 1990’î pêşkêş dike.

Mehmûd Yeşîl ku di hilbijartina 1989’an de ji lîsteya Turgut Atalay li Amedê dibe endamê Meclisa Şaredariyê, wekî siyaset zêdetir xwe nêzî tevgera Başûr dibîne.

Yeşîl qala têkiliya xwe û Wedat Aydin jî dike lê di pirtûka ku ji salên 50‘î û heta roja îroyîn bîranînên xwe pêşkêş kirine de qet qala tevgera bakur nake. Di pirtûkê de hin kêmasiyên din jî di nava xwe de dihebînin: Mînak agahiyên ku hatine pêşkêş kirin dîroka wan nediyar e. Dîsa mînakek ji hilbijartina ku Turgut Atalay bi ser ketiye û ew jî bûye encuman de wisa dibêje, “Hilbijartin çêbû. Turgut Atalay serokatiya şaredariyê kar kir. Bawer im li derdora 17 hezar deng wergirt.” Di wê hilbijartinê de Atalay 18 hezar û 498 deng girt. Her çiqas di mînakên wisa de kêmasiyên pirtûkê hebin jî (ku dikaribû bi lêkolîneke biçûk van kêmasiyan ji holê rake) xwendevan bi çaveke cihê hin bîranînên 50 salên dawî di “Desteyek ji çîroka jiyana min” de dibîne. Her wiha di dawiya pirtûkê de hin wêneyên bi bîranînan ve eleqedar jî cih girtine.

Desteyek ji çîrokıa jiyana min / Mehmûd Yeşîl / Weşanên Doz / 304 rûpel

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.