Rojnameger-Nivîskar Evrim Alataş ku ji sala 1997an ve ye tedawiya kanserê didît, îro serê sibê saet di 8.00an de, li mala xwe ya li Amedê jiyana xwe ji dest da.
Nas û xwendevanên Alataş li ber morga Goristana Yenikoy ya Amedê ku cenazeyê wê li wê derê ye, dicivin. Malbata Alataş, wê îro li Salona Resepsiyonê ya Sumerparkê taziyeyan qebûl bike.
Hate ragihandin ku wê ji bo Evrim Alataş sibê (13 Avrêl) saet di 12.30 li ber Cemiyeta Rojnamegeran a Amedê merasîmek were lidarxistin. Piştre jî wê cenaze bibin gundê Golpinar yê bi ser navçeya Akçadaxa Meletiyeyê û li wê derê bispêrin axê.
EVRİM ALATAŞ KÊ YE?
Rojnameger-nivîskar Evrim Alataş ku di demên dawîn de bi pirtûka xwe ya bi navê "Her dagin golgesi Deniz'e duşer" û bi nivîsandina seneryoya fîlmê bi xelat "Min Dît" di rojevê de bû.
Alataş di sala 1976'an de li gundê Golpinarê yê Akçadaxa Meletiyê, wekî keça malbateke kurd û elewî hate dinê. Di sala 1994'an de dest bi rojnamegeriyê kir û di rojnameyên kurdan yên bi navê Yeni Politika, Demokrasî, Ozgur Bakiş û Ulkede Ozgur Gundem de wekî nûçegihan û edîtor xebitî.
Her wisa Alataş di rojnameyên wekî Evrensel, Birgun, Ozgur Politika û herî dawî jî di rojnameya Tarafê de quncik dinivîsand. Ligel rojnameyan gelek nivîsên wê di kovarên wekî Esmer, Tîroj, Birikim, Amargî û Radikal 2'yê de hatin weşandin.
Di sala 2003'yan de bi navê "Mayoz Bolunme Hikayeleri" pirtûkek wê ji weşanên Aramê derketibû. Pirtûka Alataş a dawîn jî di 15'ê gelawêja 2009'an de bi navê "Her Dagin Golgesi Deniz'e Duşer" ji weşanên İletişimê derketibû.
.jpg)
