AMED

Şaredarê Bajarê Mezin ê Amedê Osman Baydemîr, di çalakiya şermezarkirina li dijî êrîşa Hevserokê DTP'a hatî girtin Ahmed Turk de axivî û bal kişand ser gotina 'nexweşiyên derûnî yên êrîşkar hene' û got: "Li vi welatî dîn pir in, tenê li Samsûnê tune ne. Ger ku dînê Samsûnê hebin, li Amed û Culemêrgê jî dîn hene." Hevseroka BDP'ê Gulten Kişanak jî êrîş şermezar kir û destnîşan kir ku nikarin bi jikar durkirina 2 polîsan ser bûyerê de bigirin.

Bi hezaran kes, bi boneya êrîşa ku li Samsûnê li dijî Hevserokê DTP'ê Ahmed Turk pêk hatî şermezar bikin ji serê sibê ve li ber Rêxistina BDP'ya Amedê li hev kom bûn. Girseyê bi dirûşmeyên "Tolhildan", "Faşîst Samsun", "Dêstê dirêjî Ahmed Turk dibin bila bişkên", "Ciwan biçin Botanê welatên azad" û "Êrîş me bêzar nakin" berz kirin.

Bi nêzîkbûna saeta daxuyaniyê re ligel Hevseroka BDP'ê Gulten Kişanak, parlementerên BDP'ê Emîne Ayna, Akin Bîrdal, Şaredarê Bajarê Mezin ê Amedê Osman Baydemîr, endam û rêveberên BDP'ê û şaredarên BDP'ê bi hezaran kes kom bûn.

Serokê BDP'a Amedê Cafer Kan daxuyanî xwend û diyar kir ku êrîşa li dijî Turk, li dijî gelê kurd û azadiyê ye. Kan, destnîşan kir ku ev êrîş bi organîze hatiye kirin û Serokwezîr Erdogan berpirsiyar dît.

Şaredarê Bajarê Mezin ê Amedê Osman Baydemîr jî bûyer şermezar kir û wiha got: "Gelê Amedê yê bi rûmet û dayikên aştiyê, ez li hemberî we bi hurmetî bejna xwe ditewînim" û dest bi axaftinê kir. Baydemîr, diyar kir ku, ev êrîş li dijî hemû gelê kurd pêk hatiye û wiha axivî: "Ê çi ji we hat. Çima hûn verişiyan? Hûn wê bi vê rêbazê pirsgirêkê çareser bikin? Ji Şêx Seîd heta Seyît Riza, ji Mazlum Dogan heta Ahmed Turk vî gelî li hemberî êrîş û zordariyan serî netewand. Wê ji niha û şûnde jî serî li hemberî zilm û zordariyê tu carî netewîne. Ger ku me serî li hemberî zilmê bitewanda, dema gundên me hatin şewitandin me yê serî bitewanda. Girseyê di axaftina baydemîr de "Êrîş me bêzar nakin" berz kir. Baydemîr piştre bi kurdî axivî û got "Bi xwedê, bi xwedê em serî dananîn."

'Dînên Amed û Colemrgê jî hene!

Baydemîr got, "Dema ku mirov rêjeya dînên Tirkiyeyê dinêre, rêjeya dînan gelek zêdeye" û wiha axaftina xwe domand: "Li vî welatî tenê li Samsunê dîn tune ne, li Amed û Colemêrgê jî dîn hene. Kevirê dînekî, çil biaqil nikarin ji bîrê derxin. Çareseriya pirsgirêka kurd, hewaleyî dînan nekin." Baydemîr ji gel lêborîna xwe xwest û bi gotinên tund wiha berdewam kir: "Tu rezîl, tu bêşeref nikarin, bi rûmeta gelê min bilîzin. Sekna gelê min ya bi biryar wê rê li ber van provakasyonan bigire. Em wê birîna xwe di hundirê xwe de veşêrin û sebra xwe biparêzin. Di vê rêyê de tu zarokên Kurdan namirin. Rêya me rêya aştî û demokrasiyê ye."

Hevseroka BDP'ê Gulten Kişanak, piştî Baydemîr dora axaftinê girt. Li ser gotina "Silavên Ehmed Turk ji we re hene" girseyê jî bi sloganên "Amed bi we serbilind e" û "Destên dirêjî Turk dibin bila bişkên" bersiv dan. Kişanak, gotina Turk ya wekî "Hûn nikarin me bi tewînin" bibîrxist û got, "Çi dibe bila bibe, em dest ji têkoşîna gelê xwe bernadin. Em wê têkoşîna xwe bi serkeftinê bi taç bikin" Kişanak, anî ziman ku, para Erdogan ya kesî di vê êrîşê de heye û xwest Serokwezîr ji gelê Tirkiyeyê lêborîn bixwaze." Kişanak, di dawiya axaftina xwe de xwest berpirsyar bên sizakirin.

***

Nûçeyên eleqedar:

- Piştî êrîşa Turk du midûr ji kar hatin girtin

- Li hemberî êrîşa dijî Turk wê çalakî li dar bikeve

- Êrîşê Ahmed Turk kirin