Diyarname
Di maça çarîk fînalê de Swêd û Îngilistan hatin hemberî hev. Îngilîzan di deqîqeya 30'î bi Maguire, di deqîqeya 59'an de jî bi Dele gol avêt û maç bi dest xist. Bi vê encamê Îngilistanê Swêd têk bir û derbasî nîv fînalê bû.
Di maça êvarê de dê Rusya û Hirvatistan bên hemberî hev, kîjan bi ser bikeve dê bibe reqîbê Îngilistanê.

Bi penaltiyan Hirvatistan bi ser ket
Maça herî bi heyecan bû maça rusan û hirvatan. 4 gol hatin avêtin lê encax bi penaltiyan karîn hev têk bibin.
Her du tîm di asta hev de bûn. Di nîveka yekemîn de jî duyemîn de jî hema hema wekî hev êrîş dikirin, wekî hev diketin nava parastinê. Di deqîqeya 31'ê de Rusya bi gola Cheryshev 1-0 derket pêş, Hirvatistanê di deqîqeya 39'an de bi Kramaric bersiv da. 90 deqe wisa derbas bû. Maç derbasî 30 deqeyên dem dirêj bû. Vê carê Hirvatistan derket pêş: Vida di deqîqeya 101'ê de encam anî 2-1'ê lê Rusyayê dest ji maçê berneda û di deqîqeya 115'an de bi Fernandes bersiv da. Û piştî 120 deqîqeyî maç derbasî penaltiyan bû.
Di vê Kûpaya Cîhanê de ev çaremîn maç bû derbasî penaltiyan dibû. Di Dora 16'an de Rusyayê bi penaltiyan Spanya têk biribû, Hirvatistanê Danîmarka bi heman awayî têk biribû. Îngilistanê jî Kolombiya bi penaltiyan têk biribû. Û niha di vê çarîk fînalê yekem car, di temamê vê tûrnûvayê de jî bû çaremîn car encam bi penaltiyan diyar dibe. Her du tîman jî reqîbên xwe bi penaltiyan têk biribûn û hatibûn çarîk fînalê, vê carê ji her duyan yek dê bi ser biketa; Hirvatistan bi ser ket. Piştî 1998'an, piştî 20 salan carek din Hirvatistan derket nîv fînalê.
Di nîv fînalê de Hirvatistan û Îngilistan dê bi hev re bilîzin.

Nîv fînal kengê ye?
Li gor bernameya Kûpaya Cîhanê di nîv fînalê de 10'ê mehê saet 21'ê de dê Fransa û Belçîka li hev hev bilîzin. Roja din jî Îngilistan û Hirvatistan heman saetê dê bi hev re bilîzin. Ji van du tîm dê derbasî fînalê bibin, her du tîmên têk herin jî bi hev re dê ji bo maça sêyemînî bilîzin.

***

Ji bo agahiyên berfirehtir fermo rûpela me ya taybet:

- RÛPELA TAYBET A KÛPAYA CÎHANÊ 2018