Diyarname

HDP'ê biryar dabû ji Culemêrg û Edîrneyê ji du milan Meşa Demokrasiyê roja 15'ê mehê bide dest pê kirin. Ji roja ev beryar hat dayîn de hin waliyên bajaran çalakiyên li nav bajêr qedexe kirin. Ligel her tiştî meşê îro li her du milan dest pê kir. 

Vane agahiyên îro:

- Li milê Culemêrgê Hevserokê HDP'ê Mithat Sancar, Hevserokê KCD'ê Berdan Ozturk,  Hevseroka DBP'ê Saliha Aydeniz, Berdevkê HDK'ê Sedat Şenoglu, Hevseroka SYKP'ê Canan Yuce, Cîgira Hevserokên ESP'ê Beycan Taşkiran, endamên Lijneya Rêveberî, endamên Meclisa Partiyê û mebûsên HDP'ê amade bûn. Heyet duh çûbû Pira Ciwanan, hin hevdîtin çêkiribûn û paşê îro meş da dest pê kirin, berê xwe da Wanê.

- Heyet ji Culemêrgê ket rê û çû Wanê. Li Wanê li ser Van AVM'yê polîsan êrîşê komek ciwanên ku hatibûn pêşwaziya komê kirin. Her wiha polîsan êrîşê mebûsên HDP'ê Habib Eksik, Abdullah Çok û Nuran İmir jî kir. Ligel êrîşê jî gel bi diruşma "Bijî berxwedana HDP'ê", "HDP gel e gel li vir e", "AKP Derbekar e" bilind kirin.

Sancar: Me strana azadiyê vegot

- Heyet derbasî Navenda HDP'ê ya Wanê bû. Sancar li vir axivî û got: "Li Wanê bi awayekî xweş em hatin pêşwazîkirin. Astengî hebûn lê me her tişt got û me dest bi meşê kir. Di meşê de em mafê xwe yê demokratîk bikar tînin, em bi şêweyeke kamilbûyî dimeşin. Armanca me ew e em daxwaza xwe ya edalet, azadî, demokrasiyê ligel gelê xwe parve bikin. Ji bo em vê pêl bi pêl li her derê Tirkiyeyê belav bikin me ji Culemêrgê heta Edîrneyê meş da dest pê kirin, heta wir emê strana azadiyê vebêjin."

Waliyê Stenbolê qedexe danî

- HDP'ê ji bo meşa li Stenbolê amadehî kir. Li navçeya Şîşlî, Gungoren, Bakirkoy, Esenler, Avcilar, Gazîosmanpaşa, Umraniye, Sancaktepe civîn pêk anî. Gel eleqe nîşanî civînan da.

- Cîgirê Waliyê Stenbolê biryar da ku heta dawiya vê mehê çalakî û meşên li Stenbolê qedexe ne. Di daxuyaniyê de sedem jî wekî meseleya pandemî nîşan da. Walîtî tenê rê li ber daxuyaniyên li nav avahiyan û herî zêde hatine cem hev a 50 kesî da. Got ku divê li gor rewşan pandemî tevgerîn çêbibe.

Li Edîrneyê êrîş

Meşa milê Edîrneyê jî serê sibê dest pê kir. Serê sibê polîsan Rêxistina Bajêr a Edîrneyê dorpîç kir. Li vir êrîşê kesên hatin ba hev kirin û hin kes hatin desteserkirin.

Li Edeneyê saet li dor 12'yan  Heyeta HDP'ê hat ba hev. Hevseroka HDP'ê Pervin Buldan, Berdevka HDK'ê İdil Ugurlu, Hevserokê  DBP'ê Keskin Bayindir, Serokê TÎP'ê Erkan Baş, Hevseroka ESP'ê Ozlem Gumuştaş, Hevserokê berê yê HDP’ê Sezai Temelli, mebûsên HDP'ê Saruhan Oluç, Meral Danış Beştaş, Serpil Kemalbay, Musa Piroglu, Tuma Çelik, Omer Ocalan, Fatma Kurtulan, Dersim Dag, Omer Faruk Gergerlioglu, Zeynel Ozen, Ayşe Acar Başaran, Filiz Kerestecioglu  û gelek endamên saziyên sivîl di nav heyeta dê bimeşe de hebûn.

Li ser navê heyetê Pervin Buldan daxuyanî û heyet ber bi Girtîgeha Edîrne ve ket rê. Heyet li cihek nêzî girtîgehê hat ba hev û dest bi meşê kir. 
- Heyet ji Edîrneyê dê here rawestgeha duyemîn Stenbolê. Li Stenbolê li gelek cihan dê meş û çalakî li dar bikevin.

- Hinek rojnamegerên ku di çapemeniya muxalif de dixebitin ji rê hatin vegerandin. Polîsan nehişt ew bikevin Edîrneyê. Ligel ku di karê rojnamegerî û ji aliyê hiqûqê ve tiştek wisa nîn be jî polîsan tenê kesên nasnameya wan a zer hebû (Wezareta Karên Hundir vê nasnameyê dide) destûr da wan, yên din ligel nasnameyên wan ên rojnamegerî yên saziyên wan hebûn jî destûr nedan wan.

Waliyan qedexe kir

- Waliyên bajarên wekî Tekîrdag, Edîrne, Culemêrg, Wan, Kocaelî, Stenbolê ragihandin ku dê meş û hatina ba hev bêne bisînorkirin. Bi awayekî din hin qedexe danîn ber meşên ku dê bêne kirin.

Baroyên Herêmê piştgirî dan

- Baroyên Herîmê li Mêrdînê hatin ba hev û gotin ku ewê piştgiriya her cure meşên demokratîk bikin.

Serokên Baroyên Herîmî ku di nav de Baroyên  Amed, Agirî Batman, Culemêrg, Çewlig, Dêrsim, Mêrdin, Mûş, Semsûr, Şirnex, Riha û Wan hene ji bo li ser Zagona Parêzeran biaxivin rojên 13-14'ê mehê li Mêrdînê hatin ba hev. Di daxuyaniya encamnameyê de piştgiriya meşê kirin.