AMED
Li Amedê mîtîngê Ked, Demokrasî û Azadiyê bi beşdariya 100 hezaran kesî dest pê kir. Biryara "Xweseriya Demokratîk" a ku ji aliyê Konseya Bajêr ve hate eşkerakirin ji aliyê 100 hezaran kesî ve hate erêkirin.
Mîtînga Eniyê ya Amedê ku bi rojan e her kes li bendê bû dest pê kir. Ji 100 hezarî zêdetir kes li Qada Îstasyonê hatin ba hev. Di pankart, slogan û dowîzan de nerazîbûnên li dijî AKP'ê hatin vegotin. Ji ber qerebalixê îzdîham derket.
Di mitîngê de li ser navê Konseya Bajar a Demokratîk a Amedê Medenî Alpkaya, biryara konseyê ya "Xweseriya Demokratîk bixin jiyanê" xwend û pêşkêşî dengên sed hezaran kir. Bi sed hezaran kesî bersiva "erê" da.
Di mîtîngê de Hevserokên Giştî yên BDP'ê Hamît Geylanî û Fîlîz Koçalî, Berendamên Bloka Ked, Demokrasî û Azadiyê yên Amedê Leyla Zana, Nursel Aydogan, Emîne Ayna, Altan Tan, Şerafettîn Elçî, Wekîlê berendamê girtî Hatîp Dîcle, Serokê BDP'ya Amedê M. Alî Aydîn, Şaredarê Bajarê Mezin ê Amedê Osman Baydemîr, şaredarên navçeyan, Murat Çelîkkan, Hakan Tahmaz, Osman Kavala, Orhan Dînk, Feleknaz Uca, Huseyîn Ayman, Serokê Giştî yê HAKPAR'ê Bayram Bozyel jî amade bûn.