Amed
LRN ya BDP'ê û hemû mebûsên Blokê li Amedê li hev civiyan û biryar dan: Heta parlemen û desthilatdarî vê neheqiyê ji holê raneke û pêşî li siyaseta demokratîk veneke emê neçin parlemenê.

Li ser biryara YSK'ê ku mebûsiya Hatip Dicle betal kir, îro endamên Lijneya Rêveberiya Navendî (LRN) ya BDP'ê û mebûsên Bloka Ked, Demokrasî û Azadiyê îro li Amedê li Navenda Çanda Cegerxwîn civiyan.
Piştî civînê li ser navê hemû mebûsan Şerafettin Elçi daxuyaniya ku hate amade kirin xwend.

Elçi got ku ji roja ku ji bo aştiya gelên Tirkiyeyê em hatine ba hev bûne hedefa operasyonê û wisa dom kir: "Pêvajoya ku bi vetoya YSK'ê dest pê kir, bi girtinên kêfî, binçavkirin, bi operasyonên leşkerî û siyasî bênavber didome. Gava dawî ya astengîkirin û pêşîlêgirtina aştiyê ya dawî mafê mebûsê Amedê birêz Hatip Dicle ji aliyê saziyeke bêraye ve hatiye dizîn. Duh kesên ku digotin em mexdûrê kirinên bi vî rengî ne, îro pêşengiya operasyonên bi vî rengî dikin."

Elçi bal kişand ser îhtîmala berdewamkirina operasyonan û wisa got: "Bloka me ku soza aştî û azadiyê daye gelê me, tê dîtin ku di bin van şert û mercan de dê bibe muxatabê kirinên wisa. Parlemen û desthilatdarî heta gaveke berbiçav neavêje emê neçin parlemenê. AK Partî mebûsiya ku hatiye dizîn divê teslîmê kesê heq kiriye bike. Em bang li hêzên demokratîk, aştî û azadiyê dikin ku li hemberî operasyonên bi vî rengî bibin alîgirên demokrasiyê.