Diyarname
Ev demeke dirêj e li ser reklama bi kurdî nîqaş hebû. RTUK'ê rêziknameya xwe guhart û rê li ber reklamên bi kurdî vekir. Tê texmînkirin ku heta du mehan ev rêzikname dê bikeve pratîkê. Piştî rêzikname bêweşandin televîzyonên ku bixwazin dê bikaribin bi kurdî weşanê bikin. Her wiha RTUK'ê rê li ber kanaleke nêzî Hîzbullahê vekir.

Li Tirkiyeyê, Lijneya Bilind a Radyo û Televîzyonê (RTUK) di rêziknameya xwe de hin guharîn pêk anîn.

Di "Rêziknameya li ser esas û isûlên xizmeta weşanên radyo û televîzyonê", di beşa "reklamên bi zimanên derveyî tirkî" de guharîn pêk hat. Bi vê guherînê re ne tenê televîzyona dewletê hemû kanalên televîzyonê ger bixwazin dê bikaribin bi kurdî weşanê bikin. Li bendê ne ku ev rêzikname heta du mehan bikeve pratîkê.

"Çagri"ya bi kurdî ya Hîzbullahê

Dîsa endamên RTUK'ê di civîna xwe ya dawî de serîlêdana weşanê ya televîzyoneke bi navê "Çagri" pejirand. Endamên RTUK'ê yên ji partiyên muxalîf ragihandin ku ev kanal kanaleke nêzî endamên Hîzbullahê ye û kanal dê bi kurdî weşanê bike.

Li Amedê, radyoyeke bi navê Çagri FM li Amedê û derdora wê weşan dikir. Ev demekê ye di malpera vê radyoyê de reklama Çagri TV dihat kirin û di heman demê de li ser înternetê re weşana testê dikir; niha ev kanal dê dest bi weşanê bide. Tê gotin ku Çagri TV dê di weşana xwe de cih bide tirkî, kurdî û erebî. Kanalê îsal serî li RTUK'ê dabû, di meha avrêlê de pêşerêkirineke girtibû, niha êdî dê bikaribe weşanê bike. Her wiha niha li ser înternetê re ev kanal weşana xwe dike.