Diyarname
Kralê Erebistana Siûdî Abdullah got ku di hilbijartinê de dê mafên dengdan û hilbijartinê bidin jinan.

Li gor daxuyaniya ku kral roja 25'ê mehê weşandiye de dibêje ku di hilbijartina herêmî ya 2015'an de dê jin bikaribin deng bidin û bibin berendam. Her wiha wî gotiye ku di şûraya ku ew hildibijêre û niha hemû ji mêran pêk tê de jî dê jin bikaribin cih bigirin.

Nûçegîhana BBC Emily Buchanan diyar kiriye ku ev pêşketin ji bo jinan gaveke awarte ye.

Hilbijartina herî nêz di vê roja pêncşema li pêşiya me de tê lidarxistin lê di vê hilbijartinê de jin nikarin deng bidin.

Li kraliyetê yekemîn hilbijartina herêmî di sala 2005'an de hatibû kirin.

Li herêma Rojhilata Navîn bi çalakiyan re pêşketinên mezin derdikevin pêş û niha ev bandorê li Siûdî jî dikin. Heta niha li Erebistana Siûdî jinek bêyî xizmekî wê li cem be nedikarî rêwîtiyê bike, bixebite û emeliyet bibe, her wiha nedikarî erebeyê bajo. Çalakgeran di çalakiyên li dar dixistin de her daxwaza mafên jinan jî dikirin.

Nivîskarê siûdî Nimah Îsmaîl ji bo BBC wisa gotiye: "Ev demeke dirêj bû em li benda vê biryara kral bûn û ji bo vê yekê me gelek xebat kiribû."