Diyarname

Nivîskar, coxrafyanas Abdurrahman Onen ku demeke bi nexweşiya pençeşêrê re têdikoşiya îro berî sibê canê xwe ji dest da. 

Abdurrahman Onen bi xebatên xwe yên li ser ernîgariya Kurdistanê dihat nasîn. 

Di sala 2008'an de, berhema wî ya bi navê "Ferhenga Erdnîgariyê" hatibû çapkirin. Di 2020'î de jî berhemên wî yên bi navê "Erdnîgariya Kurdistanê I: Agirî" û "Ernîgariya Kurdistanê II: Wan" di nava Weşanên Weqfa Îsmaîl Beşikcî de hatibûn çapkirin.

 Her wisa berhemên wî yên ji heman rêzê, Bedlîs, Mûş, Dêrsim, Çewlig, Mêrdîn û Amed jî amade û di pêvajoya çapê de ne.

Abdurrahman Onen kî ye?

Abdurrahman Onen ji navçeya Dêrika Çîyayê Mazî ya Mêrdînê ye. Roj 24.02.1956'an de hatiye dinê. Dibistana seretayî û navendî li Dêrikê, ya amadeyî (lîse) li Mêrdînê, zanîngeh li Stenbolê xwendiye. (Zanîngeha Stenbolê, Fakulteya Wêjeyî, Beşa Erdnîgariyê) 

Piştî xwendina dibistana amadeyîyê sê salan li Dêrikê cotkarî kiriye. Di sala 1976'an de li Stenbolê bi cî bûye, ji sala 1976'an heta 1980'yî xwendina zanîngehê û karê tekstîlê bi hev re meşandiye. Di payîza sala 1980'yî de, li Midyadê (navçeya Mêrdînê) dest bi mamostetiya erdnîgariyê kiriye. Piştî deh mehan, ji ber hin sedemên sîyasî dev ji mamostetiyê berdaye.

 Di sala 1984'an de, cardin li mamostetiyê vegeriyaye. Heta sala 2008'an li Stenbolê li gelek dibistanan mamostetiya erdnîgariyê kiriye û di sala 2008'an de malnişîn (teqawid) bûye.

 Çend salan mamostetiya dersa kurmancî û dersa kompîturê jî kiriye. Di destpêka salên 1990'î de, hewldaneke mamosteyên kurd a ji bo birêxistinbûnê dest pê kiriye. Mamosteyên ku xwestine di nav mamosteyên kurd de xwendin û nivîsandina bi kurdî geş bikin, ev armanc danîne ber xwe: 

- Pêkanîna arşîv û pirtûkxaneya perwerdeya bi kurdî.

- Wergera pirtûkên dersan ên bi tîpên kîrîlî û erebî ya ji bo tîpên latinî.

- Pêdekirina hemû pirtûkên ku li ser kurdan hatine nivîsandin.

- Xebatên ji bo nivîsandina pirtûkên dersên kurdî. 

Mamoste û nivîskar Onen jî di nav vê xebatê de bû. Di vê çarçoweyê de, wî jî biryar daye ku ji bo erdnîgariya Kurdistanê bixebite da ku wekî mamosteyekî kurd karibe dersa erdnîgariyê bi kurdî bide. 

Di encama van xebatan de, di sala 2008'an de pirtûka wî ya bi navê Ferhenga Erdnîgariyê hatiye weşandin. 

Ji sala 2013'yan ve gera xwe ya li Kurdistanê didomand. 

Piştî pirtûka wî ya bi navê "Erdnîgarîya Kurdıstanê-I: Agirî", "Erdnîgarîya Kurdıstanê-II: Wan". Beşên din ên vê rêzeyê amade ne lê wisa diyar e piştî ewê nebîne. Berhemên wî yên amade lê hê çapnebûyî jî ev in:  Bedlîs, Çewlig, Mêrdîn û Amed.