Diyarname

Di hilbijartinê giştî ya Norwecê de îtîfaka partiyên çep bi ser ket û niha dê dest bi hevdîtinên ji bo koalîsyonê bikin.

Bloka Çep di bin rêberiya Serokê Partiya Karkeran Jonas Gahr Stoere de ket hilbijartinê û dawî li desthilatdariya Serokwezîr Erna Solberg anî.

Li gor agahiyên pêşî ji 169 kursiyên li parlemenê îtîfaka çep 100 kursî girtine. Koalîsyona rasgir a di bin rêberiya Serokwezîr Solberg de bi vê encamê têk çû.

Di propagandayên hilbijartinê de germa global û hilberîna petrolê derket pêş.

Stoere ji bo koalîsyonê dê dest bi hevdîtinan bike. Berî vê yekê got, "Baweriya min ew e divê hikumete berfireh bê sazkirin û heta ji min bê ji bo ji gelek partiyan pişgirî bigirim ezê bixebitim."

2 KURD JÎ HATIN HILBIJARTIN

Li aliyê din di nav Eniya Çep de 2 kurd jî wekî mebûs hatin hilbijartin.  Ji wan Seher Aydar (ji lîsteya Partiya Sor) ji Bakur e û Manî Hussaini (ji lîsteya Partiya Karkeran) jî ji Rojavayê Kurdistanê ye. Yekem car e li Norwecê du kurd wekî mebûs têne hilbijantin.