Diyarname

Rêxistina Jongfruske Mienskip bi nameyekê ji parlamentoya herêma Friesland a li bakur rojavayê Hollandayê xwest ku mîna parlamentoya Katalonyayê Rêveberiya Xweser a Bakur û Rojhilatê Sûriyê nas bike.

Name ji aliyê Schord Groenehof ve hatiye şandin ku ew endamê Meclisa Rêveber û Şêwirmendên Siyasî yê Jongfryske Mienskipê ye.

Li gor nûçeya ANHA'yê di nameya xwe de gotiye têkiliya wan bi gelek neteweyan re hene, gelek caran ji wan tê xwestin ku piştgiriya wan bikin ne tenê li ser asta fikir lê belê di pratîkê de û wiha dom kiriye: "Rojava herêmeke li bakur û rojhilatê Sûriyê ye, bi piranî kurd lê dijîn li rex wan ermen, asûr, tirkmen û çerkes hene. Rêveberiya li Rojava dixwaze ev herêm wekî federasyoneke bê naskirin û dixwaze bi herêmên din ên Sûriyê re hevkariyê bike. Li Rojava di 2012`an de statuyeke siyasî hatiya avakirin. Em ji parlamentoya Friesland dixwazin mîna Katalonyayê bike.Em ji endamên parlamentoyê dixwazin ku di civîna xwe ya bê de naskirina Rojava wek rêveberiyeke xweser nîqaş bikin. Ev ne cara yekemîn ku parlamentoya Friesland wisa dike, di 26'ê sibata/reşemiya 1782'yan de Dewletên Yekbûyî ya Amerîkayê wekî dewleteke xwedî serdestî nas kir.

Herêma Friesland ji herêmên din ên Hollandayê cuda ye ku gelekî ne hollandî lê heye û hatiye naskirin, piraniya niştecihên wê bi zimanê frizî diaxivin. Helwestên îstîsna li hemberî vê cudahiyê tê xwestin. Piştgiriya kêmneteweyan, exlaq, aqilmendî û siyasetên baş pêwîst dike."

Rêxistê gotiye ku baweriya wan ew e ku parlamentoya Friesland xwedî van taybetmendiyan e û wisa dawî li nameya xwe anîne: "Ji ber wê em bang lê dikin ku Rojava wekî federasyon nas bike."

Friesland ku der e?

Bi felemenî "Friesland" yan jî Frîzya li Hollandayê herêmeke xweser e. Nufûsa wir dor 650 hezar kesî ye, ew bi zimanê frîzî diaxivin. Tê gotin ku frîzî kokê îngilîzî ye. Bajarê navendî yê Frieslandê Leeuwarden e ku nufûsa wir 91 hezar kes e.