DiyarName.Com

Ji bajarên mezin li Wanê Stenbolê, her wiha li gelek cihên din gel daket qadan û Newroza xwe pîroz kirin. Va ne notên ji

Ji bajarên mezin li Wanê Stenbolê, her wiha li gelek cihên din gel daket qadan û Newroza xwe pîroz kirin. Di hemû Newrozan de pankarta "Dem dema serkeftinê ye" ku diruşma îsal bû bi kurdî û tirkî hat daliqandin. Ligel diruşmên wekî "Bijî Newroz", ji bo Ocalan jî diruşm hatin bilind kirin. Va ne ji bo roja 20'ê adarê notên ji Newrozên bajarên cur bi cur:

WAN

Li ber Keleha Wanê wekî ser sal îsal jî bi alan û rengan hatibû xemilandin. Ligel barîna berfê jî gel qada Newrozê dagirt, bi coş diruşmên xwe bilind kirin. Ji Hevserokên HDP’ya Wanê Handan Karakoyun got, “Newroz benxwedan û têkoşîn e”, Fîkret Dogan jî got, “Me bi hezaran berdêl da û em gihîştin heta vê derê. Hûn xwedî li vê berdêlê derketin, em sipasiya we hemûyan dikin.

Piştî axawtinan hunermen Ayfer Duzdaş stranên xwe pêşkêş kirin.

STENBOL

Li Stenbolê bi pêxistina agirê Newrozê re çalakiya pîrozbahiya Newrozê dest pê kir. Agir ji aliyhe Dayikên Aştiyê ve hat pêxistin.

Li Stenbolê ligel Hevserokê HDP’ê Mithat Sancar, serokên partî û saziyên din ku ligel HDP di nav xebat û îtîfaqa Rêya Sêyemîn de ne axivîn. Sancar bi kurdî dest bi axaftina xwe kir, bi tirkî domand, dîsa vegeriya kurdî. Sancar got ku dema em dibêjin aştî ew dibêjin qey em ditirsin, na. Têkoşîna herî mezin têkoşîna ji bo aştiyê ye. emê vê aştiyê bînin, aştî heman li her derê. Her wiha Sancar got ku ew girêdayî daxuyaniya ku di Newroza 2013’yan de hat xwendin, li dû peymana ku li Dolmabahçeyê hate eşkere kirin in û her wiha ew li ser danezana partiya xwe ne ku me di meha rezbera 2021’ê de belav kir.

Sancar wisa got, “Em soz didin, emê miheqeq bi ser bikevin. Em hemû bi hev re dibêjin, emê miheqeq bi ser bikevin. We soz da? (Gel bersiv da). Bibihîzin baronên şer, muktedîrên hêviya wan bi xwîn, talan, derew û kedxwarî ye, vî dengî bibihîzin. Em tên, hêza gel tê, bibiryariya têkoşînê tê. Mîlyonên ku soz dane dê biharê bînin vî welatî tên.”

Ji axaftgeran Serokê Giştî yê EMEP’ê Ercument Akdenîz gotina Cegerxwîn ‘Ger em nebin yek emê biçin yek bi yek’ bi kurdî û tirkî anî ziman û got, “Va ye gotina herî xweş ku îtîfaqa gel bi awayekî xweşik tîne ziman. Emê bi hev re bi ser bikevin, wê gel bi ser bikeve.”

Li aliyê din Hevserokên HDP’ya Stenbolê Ferhat Encu û Îlknur Bîrol, Hevserokê DBP’ê Keskîn Bayindir jî axivî.

Polîsan piranî nedihişt gel tiştên kesk û sor û zer bibin hundirê qadê, lê disa jî gelek amûrên wisa ketin qadê. Her wiha nehiştin keske berstûka ku wêneyê Sehalattin Demîrtaş û ala HDP’ê li ser e bixe nav qadê lê dîsa hat dîtin ku hin ji van berstûkan ketine qadên. Berstûkên Amed Sporê, ala fermî ya Başûrê Kurdistanê, alek ku li ser “Kurdên Nasyonalîst” nivîsî jî li qadê bû. Ji salên borî cudatir ligel alên HDP’ê gelek alên DBP’ê jî hebûn.

Ligel rojeke sar û ligel sermaya bi şid a ji behrê dihat jî gel qad dagirt. Ji destpêka Newrozê heta dawî her çûn û hatin hebûn, ji ber sermayê tevgerek çalak hebû. Û ji ber vê sermayê li nava qadê jî gelek kes kom bûn û li nava xwe de bi tiştên ku bi dest xistin agir pê xistin û xwe germ kirin.

Grup Vardiya, Koma Sorjîn ji bo stranên xwe derketin ser dikê û herî dawî Xêro Abbas derket ser dikê û stranên xwe pêşkêş kirin.

CULEMÊRG

Li Culemêrgê li qûntarên çiyayê Simbilê ku 5 kîlomere dûrî bajêr e çalakiya Newrozhe hat li dar xistin. Hevserokên HDP’ê Humeyra Armut û Cihan Karaman axivhin û dûre agirê Newrozê hat pêxistin. Mebûsê HDP’ê Saîd Dede û Hevşaredarê Wanê Mustafa Avci ku kayûm şandine cihê wî derketin ser dikê û axivîn. Hunermend Kasim Taşdogan jî stranên xwe pêşkêş kirin.

ELEZÎZ

Li Elezîzê HDP’ê xwestibû li Xada Stasyonê Newrozê pîroz bike lê walîtî dersûr nedabû. hIro li ser avahiya HDP’ya bajêr mebûsa HDP’ê ya Mûşhe Gulistan Kiliç Koçyigit û HDP’yî hatin ba hev. Wan daxuyanî da û paşê dest bi gerandina govendê kirin.

ÇEWLIG

Li Çewliga ku hiro serma ber bi -10 derece bû de gel ber bi Kolana Hastane ve meşiya û li wir Newroz pîroz kirin.

ÎZMÎR

Li Îzmîrê bi dehezaran kes li Qada Gundogdu bûn. Ligel kincên rengîn, gelk wêneyên Denîz Poyraz a ku li avahiya HDP’ya Îzmîrê hatibû kuştin jî bi xwe re anîn qadê û bilind kirin.

ENQERE Û BAJARÊN DIN ÊN TIRKIYEYÊ

Li Enqereyê li Anitparkê bi sedan kes hatin ba hev û Newroz pîroz kirin. Li bajarên Tirkiyeyê li Çanakkale, Tekîrdag, Eskîşehîr û Bursayê jî Newroz hat pîrozkirin. Dîsa li Hatay, Antalya, Osmaniye, Aydin, Denîzlî, Manîsa, Bandirma, Ayvalik û Bodrumê jî Newroz hat pîrozkirin.

SILOPÎ

Li Silopiya Şirnexhe gel bi rengên xwe û kincên xwe ji serê sibê de ber bi qada Newrozê ve herikîn. Coşek mezin li nav gelê Silopî ji bo Newrozê hebû.
DÊRIK Û STEWR
Li Dêrik û Stewra Mêrdînê jî bi hezaran kes hatin ba hev û Newroz pîroz kirin. Siyasetmedar Ahmet Turk ku li Dêrikê bû axivî û got, "Yên ku siyaseta kurd înkar bikin dê têk herin."

EDENE

Li Edeneyê bi hezaran kes li Şanogeha Servekirî ya Mîmar Shinan hat hev. Mebûsê HDP’ê yê Edeneyê Kemal Pekoz axivî û got ku Newroz li hemberî zilmê berxwedan e û li hemberî şer jî aştî daxwaz kir.

Siyasetmedar Sirri Sakik jî li vir axivî û got, “We Neroz ji tunebûnê afirand. Îro em wekî bi mîlyonan kes vê pîroz dikin.” Sakik diyar kir ku bêyî dengên kurdan bigirin kes nikari di hilbijartina Serokomarî de bi ser bikeve û got ku ew dixwazin zagoneke bingehîn a nû saz bikin.

RIHA

Li Rihayhe gel li qada li ber Stada 11 Nîsanê hat ba hev. Di Newrozê de Mebûsên HDP’ê Nusrettin Maçin, Meral Daniş Beştaş, Omer Ocalan û Serokê KKP’ê Sinan Çiftyurek axivîn. Mebûsê HDP’ê Ocalan got, “Ocalan ji bo aştiyê, ji bo azadiyê destê xwe dirêj kiriye. Lê Erdogan ji bo desthilatdariya xwe ev 7 sal in vî destî nagire. Êrîşê gelê me kir, ew tewqîf kirin, kayûm şandin ser şaredariyan. Lê ligel her tiştî nekarîn vîna gelê me bişkînin. Îro gelê Rihayhe careke din bersiva divê da.”

Beştaş jî wisa got, “Îro roja serketin, roja berxwedanhe ye. Îro dê berxwedana Emîne Şenyaşar bê bilind kirin. Em li ber berxwedana dayika Emîne serê xwe ditewînin. Em Kemal Kurkutî, Denîz Poyrazê bibîr tînin.”

Serokê KKP’ê Çiftyurek jî di axaftina xwe de Newroza Efrîn û çar parçeyên Kurdistanê pîroz kir û got ku gelê me bi sean salan e ber xwe dide û dest ji berxwedanê bernade.

Her wiha li bajarên Semsûr û Meletî, dîsa li Elbistanê bi hezaran kesî Newroz pîroz kir.

BATMAN

Li Batmanên bi deh hezaran kes li Taxa Pazaryerî hat ba hev û bi coş Newroza xwe pîroz kir.

Berdevka Meclisa Jinan a HDP’ê Ayşe Acar Başaran, Mebûsê HDP’ê Garo Paylan, Serokê PDK-Bakur Sertaç Bucak û Dayikên Aştiyê bi hev re agirê Newrozê pêxistin û şahî dest pê kir.