Serokê Berê yê Kongreya Netewî ya Kurdistanê (KNK) rewşenbîrê Kurd ê navdar Îsmet Şerîf Vanli li bajarê Lozanê jiyana xwe ji dest da.

Îsmet Şerîf Vanli ku li bajarê Lozana Swîsreyê dijiya, îro seat di 04.00 de wefat kir. Vanli ku di 9’ê îlonê de xwîna mejiyê wî der bibû, rakiribûn Nexweşxaneya CHUV a Lozanê û li wir dihate dermankirin.

Îsmet Şerîf Vanli, di 21’ê berfanbara 1924’ê de li Şama paytexta Sûriyeyê ji dayîk bû, di salên xwe yên perwerdehiyê de nivîskar û rewşembîrên Kurd Celadet Elî Bedirxan, Qedrî û Ekrem Cemilpaşa û Nûredîn Zaza nas kir. Li vir dest bi tekoşîna di nava gelê Kurd de kir.

Vanli li Libnan, Fransa û DYA’yê perwerdehî dît û zimanê xwe yê zikmakî jî li xerîbiyê fêr bû. Vanli ji her kesî re digot “Her kes li derveyî welêt zimanê xwe ji bîr dike, lê ez li derveyî welat fêrî Kurdî bûm”. Di sala 1948'ê de li Lozanê perwerdehiya hiqûqê li Libnanê qedand, di sala 1995'an de bû Serokê Enstîtuya Kurdî ji bo Lêkolîn û Zanist li Berlînê û heman salê tevlî Parlementoya Kurdistanê ya Derveyê Welêt (PKDW) bû.

Vanli di sala 1999'an de dema Kongreya Netewî ya Kurdistanê (KNK) hate damezrandin bû serokê KNK’ê û demeke dirêj serokatî kir. Bi taybet pirtûka bi navê “Li Tirkiyeyê Pirsgirêka Netewî ya Kurdan”, gelek pirtûk û berhemên din ên Vanli hene.
Vanli, li Lozana Swîsreyê dijiya.