Diyarname

Vê carê dest danîn ser rojnameya Xwebûnê. Va ye ji salên 90'î ve heta niha ev çîrok...

Li Bakur her çiqas berê jî kurdan rojname û kovar derxistibin jî herî zêde piştî salên 90'î ev war gur bû. Rojnameyên rojane bi tirkî derketin, bi kurdî heftane derketin û her wiha kovarên bi kurdî û tirkî... Lê di heman demê de van salan bi ser çapemeniya kurdan de zordariya dewletê xwe nîşan da. Beşek ji vê zordarî jî destdanîna ser rojnameyên çapbûyî bû. Di dema rojnameya Gundemê de ev yek dest pê kir. Polîsan carinan bi awayekî fermî, carinan ne fermî dest danîn ser rojnameyan. Li hemberî vê yekê belavkarên rojnameyan jî bi awayekî veşarî ew rojname belav dikirin.

Di warê kurdî de jî bi kovara qerfî Pîneyê re ev yek dest pê kir. Walîtiya Rewşa Awarte di destpêka 2000'î de dest danîn ser Pîneyê û nehişt li herêmê belav bibe. Pîne çiqas nav guhart jî her rastî vê hat. Niha bi ser destdanîna rojnameya Gundemê re nêzî 30 salan derbas bûye, bi ser Pîneyê re dor 20 salan derbas bûye lê zêde tiştek neguheriye, loma niha jî dest danîn ser rojnameya kurdan. Rojnameya Xwebûnê ku hefteyê carek derdikeve vê hefteyê rastî vê kirinê hat.

Roja 17'ê mehê li Gara Navbajaran a Amedê polîsan bê biryara dozger û  bêyî hincetek nîşan bidin desd danîn ser 100 heb rojnameyên Xwebûnê ku ew dê bişandana Mêrsînê.

Xwediyê Rojnameya Xwebûnê rojnameger Kadri Esen ev yek şiband mînaka salên 90'î û got, "Rojnameyeke bi kurdî tenê ji ber bi kurdî weşanê dike û ji ber li Kurdistanê weşanê dike dest danîn ser. Armanc ew e nehêlin li Kurdistanê bi kurdî rojnamegerî bê kirin. Lê bila baş bê zanîn ku rojnamegeriya kurdî di bin her mercî de dê weşana xwe bidomîne."

Rojnameya Xwebûnê heftane weşana xwe dike û niha hejmara 144'an derxistiye.