Diyarname
Dosta kurdan Daniella Mitterrand îna borî rakiribûn nexweşxaneya Georges-Pompidou lê her ku çûbû rewşa wê giran bûbû. Mitterrand îro di 87 saliya xwe de jiyana xwe ji dest da.

Daniella Mitterrand di nav tevgera berxwedanê ya Fransayê de cih girt, di nav xebata mafên mirovan de cih girt, wê piştgiriyeke mezin da kurdan û tîbetiyan, jiyana xwe bi têkoşînê derbas kir û niha xatir ji hemû hezkiriyên xwe xwest.

Wê piştgirî da Serokê Kubayê Fidel Castro, ji bo jiyaneke baştir xebîtî, ji bo pirsgirêka avê ku bi awayekî adil av bê parvekirin têkoşîn da, li hemberî koletiyê derket, piştgirî da têkoşîna gelên bindest û jiyana wê her wisa derbas bû.

Daniella Mitterrand, bi navê xwe Danielle Gouze di sala 1924'an de li bajarê Verdun hat dinê. Di sala 1940'î, di 17 saliya xwe de dema artêşa Almanyayê Fransa dagir kir ew hemşîre bû û çû beşdarî Tevgera Berxwedanê bû.

Ew di 27.10.1944'an de bi François Mitterand re ku ew jî wekî wê di nav tevgera berxwedanê de bû zewicî û bi navê Gilbert û Jean-Christophe du kurên wan çêbûn.

Ew "First Lady" bû lê Ajansa Nûçeyan a Fransiz dibêje ku Mitterrand tu demê ji vê rolê hez nekiriye.

Hevsere wê François Mitterand di sala 1981'ê de di hilbijartinê de bi ser ket û bû Serokomarê Fransaye. François Mitterand du serdem ev kar kir û di sala 1996'an de ji qansêrê wefat kir.

Danielle Mitterrand piştî mêrê xew jî xebata xwe ya li ser siyaset û mafên mirovan dom kir. Rêxistina bi navê "France Libertes" ku di sala 1986'an de Danielle Mitterrandê ew ava kiribû di kewçêra îsal de 25 saliya xwe pîroz kiribû.

Danielle Mitterrand her li cem doza kurdan bû jî.  Têkiliya wê bi Barzaniyan re jî bi Ocalan re jî hebû. Peykera wê di adara 2010'an de li Helebçeyê hatibû çêkirin.
Wê di sala 1989'an de ji qampa benaberan 200 kurd biribûn welatê xwe û pêre jî ji bo başûrê Kurdistanê bibe herêma ku lê firîn qedexe ye xebitî bû.
Mitterrand her piştgiriya xwe ya ji bo kurdan anîbû ziman. Vane çend gotinên wê:
Di sala 2009'an de li Parlemena Kurdistana Federe, li Hewlêrê gotibû. "Kurdistan welatê min ê duyemîn e". Mitterrand dema Ocalan çûbû Îtalyayê jî ji bo wî gotibû "Ocalan ne terorîst, ew şervanekî azadiyê ye."
Mitterrand di dema girtina Leyla Zana û DEP'yên din de jî her piştgiriya wan kir û têkiliya wê ya bi Zana re heta niha jî her baş bû û hev didîtin.