Nivîskar Adar Jiyan pirsên Diyarnameyê yên li ser pirs û pirsgirêkên nivîs û nivîskariya kurdî bersivandin:

Tu berhema xwe di kîjan şert û mercan de diafirînî?
- Di wan şert û mercên ku hemû qadên civakî warên jiyanê tengav dikin de diafirînim.

Di dema afirandina berhemê de pirs û pirsgirêkên te yên sereke çi ne?
- Pirsgirêka sereke dem e.  Dem têra min nake.

Tu dikarî bi rehetî berhema xwe bidî çapkirin?
- Na. Pir bi zehmetî; bi pereyan û bi ser de jî bi hêvî û sed ricayê didim çapkirin.
 
Ku te dabe çapkirin, te bi weşanxaneyê re peymaneke çawa çêkiriye?
- Min berhemên xwe heta niha li du çapxaneyan dane çapkirin. Yek jê pirtûkeke min çap kirin û pirtûkek jî neda min; tev li ser hesabê xwe belav kir. Ya din jî çar pirtûkên min, belê  bi pereyên  min çap kirin û belavkirina pirtûkan ma di stûyê min de. Hê min heqê çapê dernexistiye.

Weşanger çi ji te xwest û çi da te ji bo çapkirinê?
- Çapxane, digel berhemên, min pere (heqê çapê ji min xwest). Tu tiştek neda min.

Weşanxaneya ku pirtûka te çap kir, bi qasî ku heq dike qîmet da berhema te yan na?
- Çawaniya (kalîteya) çapê baş bû. Lê belê hê tev nehatine belavkirin.

Berhem baş hate belavkirin yan na?(li cem hemû pirtûkfiroşên navendî peyda dibe yan na?)
- Belê, li gelek pirtûkfiroşên navendî jî hatin belavkirin.

Bi têra xwe reklam hate çêkirin, weşanger ji bo danasandin û reklamê berpirsiyariya xwe bi cih anî yan na?
- Çapxaneyê pirtûkên min dane nasîn û reklama wan baş hate kirin.

Ji bo te qet şevên xwendinê yan jî 'roja îmzeyê' hate çêkirin?
- Na. Ligel ku çar pirtûkên min pevre hatin çapkirin jî tu carî tiştekî wisa pêk nehat.

Bi te weşangerên kurd di warê edîtorî û redaksiyonê de berpirsiyariya xwe bi cih tînin an na? 
- Redaksiyona pirtûkên xwe min pêk anî. Hinek kêmasî hene. Belê berpirsiyariya edîtorî û tiştên din çapxaneyê bi cih anî.

Heke tu bawer dikî bi cih naynin, tu dikarî çend mînakan bidî? Lazim e ku çi bikin, nakin?
- Lazim e ku edîtor û redaktorên çapxaneyê bi profesyonelî bixebitin ku tu kêmanî nemîne. Lazim e ku her berhem seranser ji nû ve were redaktekirin. 

Tu bawer dikî sedemê kêm firotina pirtûkên kurdî weşanger in?
- Berpirsiyariya weşangeran heye. Belê ji sedî sed berpirsiyar ne ew in. Gelek sedemên cure bi cure hene. Yek ji wan jî kêmxwendin e. An jî nexwendin e. Ango nexweşiya giştî ya nexwemdinê ye. 

Ku xwendevan nebe pirtûk nayê firotin, pirtûk neyê firotin weşanger pere qezenc nake, weşanger qezenc neke pere nade nivîskar, weşanger pere nede nivîskar, nivîskar jî ji ber pirs û pirsgirêkên aborî bi têra xwe nikare ked û dema xwe bide nivîsê... Yanî bi kurtasî mesele wekî xelekên zincîrekê bi hev ve girêdayî ye... Ji bo çareserkirina pirsgirêkê divê çi bê kirin? Kî bike? Çawa bike?
- Divê ev pirsgirêk bi dorhêlî were nirxandin û li çareseriya wê bê cehdandin. Hemû hêl bandorê li hevdû dikin. Ango di navbera hemû aliyan de erênî an jî neyinî hevhîkariyeke xurt a bivênevê heye. Heke her kes berpirsiyariya xwe bi cih bianiya pirsgirêk nedima. Mixabin, wekî hemû pirsgirêkên civakî yên din ev  pirsgirêk jî ji bêberpirsiyariyê tê.

Par ji 110'an zêdetir pirtûkên kurdî hatin çapkirin, gelo te ji van çend heb KIRÎN? Ku te nekirîbûn çima?
- Ez nizanim bê min çend jê kirîne belê, ez dikarim bibêjim ku ji gelk deveran ve ji bo belavkirina pirtûkan gelek kolî ji min re tên û ez wan belav dikim. Bê guman ne minkûn e ku min hemû dîtibin an jî kirîbin.

Hejmara nivîskaran û berheman her diçe zêde dibe, lê hejmara xwendevanan zêde nabe, tu vê rewşê çawa dibînî?
- Ez vê rewşê berbixêr nabînim. Xwezî hejmara xwendevanan zêde û hejmara nivîskaran kêm bibûye. Bel rastiya vê yekê jî ev e ku her xwendevanê kurd nivîskar e û her nivîskarê kurd jî xwendevan e.