Diyarname
Merasima 20'emîn Salvegera Enstîtuya Kurdî ya Stenbolê û xelatdayîna Xelata Ziman a Feqî Huseyîn Sagniç li dar ket. Di merasimê de avakarên Enstîtuyê Musa Anter, Feqî Huseyîn Sagniç û kesên din ên jiyana xwe ji dest dane hatin bibîranîn.

Enstîtuya Kurdî ya Stenbolê 20 sal berê di sala 1992'yan de hate avakirin û di nav avakarên wê de Musa Anter û Feqî Huseyîn Sagniç jî hebûn. Ji bo salvegera Enstîtuyê li Cezayîr Restauranta li Galatasaraya Beyogluyê hat lidar xistin. Her wiha di şevê de xelata Feqî Huseyîn Sagniç ku ji sala 2005'an ve tê dayîn jî hate dayîn. Îsal nivîskar Mulazim Ocan ji bo xelatê guncan hatibû dîtin.
Di merasimê de Mebûsê BDP'ê yê Culemêrgê Adil Kurt (bi navê xwe yê nivîskarî Adil Zozanî), endamê Meclisa Partiya BDP'ê Şaban Işiktaş, Seroka BDP'a Stenbolê Asiye Kolçak, Serokê Enstîtuyê Zana Farqînî, Serokên Enstîtuyê yên Berê Şefik Beyaz, Sami Tan, Jina Feqî Huseyîn Sagniç Rabia Sagniç, Mele Celalettin Yoyler, Mele Kerem Soylu, nivîskar Fehim Işik, rojnameger Cemil Oguz, Salihê Kevirbirî, ji Meclisa Aştiyê ya Tirkiyeyê Seydi Firat, yek ji avakarên Enstîtuyê û rêveberê Weqfa Îsmaîl Beşikçi karsaz Îbrahîm Gurbuz, Xwediyê Weşanên Pêrî Ahmet Onal, Xwediyê Weşanên Vateyê Deniz Gunduk, Xwedî û edîtorê Nûbiharê Suleyman Çevik û gelek kesên din amade bûn.
Di merasima ku sînevîzyona salvegera Enstîtuyê û sînevîzyona li ser jiyana Feqî Huseyîn Sagniç hate nîşandayîn gelek kes axivîn û dîtinên xwe anîn ziman.

'Hezar carî mala xebatkaran ava'

Pêşî Serokê Enstîtê Zana Farqînî axivî û da zanîn ku dema Enstîtu hatiye avakirin ew hê ciwan bûne û diçûn zanîngehê. Farqînî got ku wê demê kesên wekî Ordîxanê Celîl, Îsmet Şerif Wanli dihatin Stenbolê, wan ji wan re rêberî dikir, ew digerandin lê niha ew, dîsa avakarê Enstîtuyê Apê Mûsa, Feqî Huseyîn Sagniç, Mele Ebdullah Varli, Mele Îsmet Kiliçarsan ne di nav me de ne û em wan bi hurmet bibîr tînin.
Serokê Enstîtuyê Farqînî got ku hezar carî mala xebatkar û serokên berê yên Enstîtuyê ava û diyar kir ku xwezî îmkan heba ew hebû bihata bibîranîn, li ser navê wan xelat bihata dayîn.

'Tiştên li vir tên nivîsî nayên ji bîrkirin'

Mebûsê BDP'ê Adil Kurt jî kesên ji nava me bar kirine bibîr anîn û got ku tekane tiştê em deynê xwe ji bo wan bidin ew e ku em xebata ziman xurt bikin. Kurt wisa got: "Ev 92 sal in zimanê kurdî di bin asîmîlasyonê de ye. Lê niha bi dehan TV'yên kurdî hene, enstîtu hene. Ewên asîlîmasyon kirine divê lêborînê bixwazin. Arinç divê lêborînê bixwaze. Û divê dest ji polîtîkayên asîmîlasyonê yên berê berdin. Tu pêdiviya kurdî bi TRT 6'a wan nîn e. Dewletê heta niha tu tiştek bi xêr ji bo kurdan nekiriye. Çi hatibe kirin, kurdan zor daye wan wisa hatiye kirin. Emê zêdetir zorê bidinê."
Kurt piştî diyar kir ku Enstîtu dezgeheke zanistiye û divê her kes xwedî lê derê wisa dom kir: "Ji bo xwedîlêderketinê bar dikeve ser milê me hemûyan. Ji ber ku hebûna me li vir tê xurkirin. Xebatên ku li vir tên kirin ji bo ronahiya me ne. Di siyasetê de tiştên tên gotin têne ji bîrkirin lê tiştên li vir têne nivîsîn nayên ji bîrkirin."

Her wiha Samî Tan, Şefik Beyaz, Celalettin Yoyler, İbrahim Gurbuz, Asiye Kolçak li ser Enstîtuyê axivîn û dîtinên xwe anîn ziman.

'Xelata Apê Feqî rûmet e'

Di dawiya axaftinan de dengê Mulazim Ozcan (Miraz Ronî) ku ji girtîgehê bi telefonê pêre hatibû axivîn û hatibû qeydkirin bi beşdaran da guhdarîkirin. Ozcan ku ji bo Xelata Ziman a Feqî Huseyîn Sagniç guncan hatibû dîtin wisa got: "Xelat mirovan teşwîqê xebatê dike. Xelatgirtina Apê Feqî hem rûmet e hem jî ji bo me teşwîqa xebatê ye. Ji vê derê ez ji bo her kesî silavên xwe dişînim."

Piştî axaftinan li ser navê Mulazim Ozcan biraziya wî Ulfiye Ozcan ji destê keça Feqî Huseyîn Sagniç Nemiş Sagniç Avşar xelat girt.

***

Nûçeyên eleqedar;

- Vexwendinek ji Enstîtuya Kurdî ya Stenbolê

- Xelata Feqî Huseyîn dan Mulazim Ozcan

 Serokê Enstîtuya Kurdî ya Stebolê Zana Farqînî.

 Mebûsê BDP'ê Adil Kurt.

Ulfiye Ozcan li ser navê Mulazim Ozcan xelat ji keça Feqî Huseyîn Sagniç Nemiş Sagniç Avşar girt.