NAVENDA NÛÇEYAN

Pêşmergeyê dêrîn û parlementerê berê yê Parlementoya Herêma Kurdistanê Ferhat Sengawî roja 8'ê mehê li bajarê Silêmaniyê daxuyanî da çapemeniyê. Sengawî bal kişand ser guhertina demokrafîk a li başûrê Kurdistanê bi taybetî Hewlêrê bi destê malbata Barzanî û PDK’ê û got; “Pêwîst e gelê kurd, rewşenbîr, siyasetmedar, hemû rêkxistin û partiyên ku xemxwerên welat û gelê xwe ne, divê di hemû alî malbata Barzanî û PDK’ê boykot bikin. Ji ber ku vê malbatê û partiya wê PDK’ê hemû Kurdistan wêran kir. Medyaya PDK’ê bênavber bi helandina hest û hişmendiya netewî ya gelê kurd ve mijûl e.”

'DILÊ WAN BI WELAT NAŞEWITE'

Sengawî da zanîn li malê bira bir, mêr jinan, xizm xizman; mirov li ser erd, wesayîtê, gotin û deynan hevdu dikujin û got; “Malbata Barzanî û PDK’ê nan û mûçeyê xelkê biriye. Azadî ji xelk veşartine. Evane hemû nîşana wê yekê ne ku rejîmeke otoriter a biyanî hukmî li vê herêmê (Başûrê Kurdistanê) dike. Ev rejîma biyanî, rejîmek wisa ye ku dile wî qet bi vî welatî û vî gelî naşewite ye.”

'MÛSIL Ê KURDISTANÊ BÛ PIŞTGUH KIRIN'

Di derbarê rewşa Mûsilê de jî Ferhat Sengawî eşkere kir ku li gorî bi sedan belgeyan, Mûsil bajarek yê Kurdistanê bû û wekî hemû deverên din ên Kurdistanê. Sengawî eşkere kir ku Mûsil di aliyê nîştecih û erdnîgariya xwe ve ji %90 Kurdistanî bû, lê ji ber Barzanî Duhok kirin parêzgah û Mûsil hat paşguhxistin û pirsî, “Desthilateke ku bibêje ez kurd im, çawa dikare xaka Kurdistanê belaş bifiroşe?”

'CADEYÊN 150 û 200 JI BO KÎ NE?'

Sengawî balkêşand ser çêkirina cadeyên 150 û 200 metrî yên li Hewlêrê û wiha got; “Dibêjin li Hewlêrê cadeyên 150 metrî û 200 metrî tên çêkirin û wê bên çêkirin, lê xwezî ev cadeyane ji bo avadaniya Kurdistanê û berjwendiyên kurd û Kurdistanê bûya. Lê evane tenê ji bo berjewendiyên wan û Tirkiyeyê ne.”

'760 HEZAR MALBAT HATINE HEWLÊRÊ'

Têkildarî guhertina demokrafîk ya li Hewlêrê jî Sengawî dîtinên xwe wiha bilêv kirin; “Dibêjin 760 hezar malbat hatine li Hewlêrê xanî kirine. Eger malbatane ji 5 kesan tenê jî pêk bên, dibe zêdetirî 3 mîlyon kesan. Wê demê we çima referanduma serxwebûna Kurdistanê kir? Kerem bikin werin niha li Hewlêrê referandûmê bikin.”

MISÛL, KERKÛK Û PIRS

Sengawî di dawiya axaftina xwe de bal kêşand ser çend metirsiyên din yên têkildarî guhertina demokrafiya Mûsilê û got; “Niha Mûsil ji dest çûye, Kerkûk ji salên 1930’an ta niha tê erebkirin û negihîştiye 500 heta 600 hezar malbatên ereb. Wê demê em çi dikin û bi çi ve mijûl în. Ma dibe ku ev yek ji yên ku dibêjin ez kurdîtiyê dikim û Kurdistanê bi rê ve dibim bê qebûlkirin?

Ji Rojnewsê hatiye girtin

 Ferhad Sengawî li Silêmanî daxuyanî da çapemeniyê.

**

Nûçeya Eleqedar:

- 'Em kirine dijminê dîrok, çand, ziman û ferhenga xwe'