Diyarname

Wezîrê Karên Derve yê Tirkiyeyê Hakan Fîdan duh çû Iraqê û ligel Serokwezîrê Iraqê Mihemed Şiya Sûdanî, Serokomarê Iraqê Letîf Reşîd û Sekreterê Rêkxistina Bedir Hadî Amirî û Serokê Esayîb Ehlî Heq Qeys Xez Elî re civiya.

Fîdan îro jî li paytexta Herêma Kurdistana Federe li Hewlêrê bû. Fîdanî ligel gelek rayedaran hevdîtin pêk anî. Her yek cuda cuda. Va ne ew not:

- Serê sibê saet 10'an de ligel Serokê Herêma Kurdistana Federe Nêçîrvan Barzanî hevdîtin çêkir.

- Ligel Serokê PDK'ê Mesud Barzanî hevdîtin çêkir.

- Ligel Serokwezîrê Herêma Kurdistana Federe Mesrûr Barzanî hevdîtin çêkir.

- Ligel Cîgerê Serokwezîrê Herêma Kurdistana Federe Qubat Talabanî hevdîtin çêkir.

- Êvarê carek din çû serdana Nêçîrvan Barzanî.

Niha pirs ev in: Li gor rêgez û protokolên têkiliyên Karên Derve wezîrek here herêmek ligel hemû rêveberên wê herêmê yek bi yek dicive?

Ligel Serokê Herêmê (em bêjin Serokomar) civaya, dûre ligel Serokwezîr jî civiya, heta astek ev temam, lê çima ligel Cîgerê Serokwezîr jî dicive? Çima, ji bo çi?

Paşê çima ligel Serokê Partiyek (Mesur Barzanî) jî dicive? Mesûd Barzanî dewletê temsîl dike û Hakan Fîdan jî dewleta Tirkiyeyê temsîl dike loma li hev civiyane? Ger wisa be çima ligel Barzaniyên din civiya? Ger na, çima ligel serokê partiyek dicive? Fidan bi kîjan nasnameyî ligel Mesûd Barzanî ciya ye, Mesûd Barzanî bi kîjan nasnameyî ew pêşwazî kiriye û çima?

Pirsek din, Fidan ligel nûnerê YNK'ê yê di nava hikumetê de (Qubat Talabanî) civiya, çima ligel Serokê YNK'ê Bafil Talabanî jî neciviya? 

Serê sibê Serokê Herêmê Nêçîrvan Barzanî pêşwazî li Fîdan kir, êvarê carek din çima li hev civiyan? Serê sibê çima Nêçîrvan Barzanî bi cilên (kincên fermî) pêşwazî li Fîdan kir, êvarê çima bi cilên rojane, bi gomlekek bê qirewat (berstûk) pêşwazî kir? Ev samîmiyet (jidilbûn) bû, yan tiştek din?

Ew li ser çi axivîne, çi biryar girtine, ev hemû aliyek e, ev hemû meseleya nûçeyek din in; lê pirsên li vir, li ser hiqûq in, rêgez û protokolên têkiliyên karên derve ne û loma jî hêjayî pirsînê ne.

Ha, ger ne hewceyê pirsê ye, hema nûçeyê wekî agahiya hevdîtineke li herêmek bixwînin û xilas.