Enqere
Piştî hevdîtina Recep Tayyip Erdogan û Kemal Kiliçdaroglu, MHP'ê reaksiyona neyînî nîşan da. Mebûsê BDP'ê yê Amedê Altan Tan axivî û got: "Hemû derdorên ku dixwazin ev pirsgirêk çareser bibe divê bên cem hev. MHP ger xwe derveyî vê dibîne bila AK Partî, CHP û BDP vê xebatê bidomînin."

Li ser pêşniyara Serokê CHP'ê Kemal Kiliçdaroglu îro Serokwezîrê Tirkiyeyê Recep Tayyip Erdogan û Kiliçdaroglu îro hatin ba hev. Hevdîtina wan li ser çareserkirina pirsgirêka kurd bû. Hevdîtina herduyan saeten dom kir. Piştî hevdîtinên li ser naverokê axaftin nehate kirin lê hate gotin ku dê ji her du aliyan giregirên wan careke din bên ba hev.

MHP di cih de dij xebateke li ser pirsgirêka kurd sekinî.

Mebûsê BDP'ê yê Amedê Altan Tan jî li ser meseleyê ji bo NTV axivî û got: "Li Tirkiyeyê di serî de pirsgirêka kurd, cihê çareseriya pirsgirêkan meclis e. Deriyên me ji bo diyalogê, muzakereyê vekirî ne. Werîn em muzakere bikin. Gava îro me baş dît. Li derveyî meclisê jî alîgirê vê meseleyê kî hene em guh bidin wan jî. Em nexşerêyeke derxin holê û çareseriyê bibînin. Ger MHP xwe derveyî vê pêvajoyê digire, xebat bi AK Partî, CHP û BDP'ê dikare bidome. Divê eşkere xebat bê meşandin. Li pêş çavên raya giştî divê muzakere bêne kirin."

Tan her wiha got ku ger AK Partî bibêje ezê tenê bi CHP'ê re vê bimeşînim çênabe.