Diyarname

"Mîrxas" navê romanekî ye. Arjen Erez nivîsandiye û ji Weşanxaneya Aryen derketiye. Romanê ku ji girtîgehê derketiye nikare bikeve girtîgehê. Balkêş e ne? Em ji serî dest pê bikin...

Arjen Erez bi navê xwe yê li nasnameyê Îsa Kaya di sala 1974'an de li gundê Heciyê yê ser Tatosa Erzeromê hatiye dinê. Di sala 1998'an de ji ber xebatên siyasî tê girtin. Piştî deh salên domkirina dadgehê cezayê muebetê didin wî. Ew niha li Girtîgeha Kayseriyê ye. Arjen Erez li girtîgehê dest bi xebatên wêjeyê dike. Pêşî bi tirkî dinivîse, paşê dest ji tirkî ber dide û berê xwe dide kurdî. Helbestan dinivîse. Di sala 2016'an de pirtûka wî ya helbestan bi navê "Qesra Helbestên Xemgîn" ji Weşanxaneya J&J'yê derdikeve. Paşê ew romanek dinivîse. Navê "Mîrxas" lê dike û ji bo çapê dişîne derve. 

Roman çîroka ciwanekî ku tiştên bi ser wî de hatine vedibêje. Heta vir her tişt normal e. 

Destxetên romanê digihîjin ber destê weşanxaneyê. Weşanxane tîprêzî dike, paşê dîzaynê û romanê dişînin çapê. Pirtûk derdikeve, belav dibe û ji nivîskar re jî pirtûkek dişînin. Heta vir jî her tişt normal e, lê tam ne normalî li vir dest pê dike. Pirtûka ku ji hundir hatiye, bi awayê çapkirî nikare here hundir.

Li gor gotina malbatê ev 3 meh in pirtûka nivîskar bi xwe nadin wî. Rêveberiya girtîgehê dibêje, "Roman di asta lêkolînkirinê de ye" lê çawa tişt e ku ev 3 meh in lêkolîna li ser xilas nebûye û roman nadin wî.

- Mîrxas / Arjen Erez / Weşanên Aryen / Roman / 422 rûpel / 2023