Diyarname

Pirtûka bi navê "Bîrgeh, Bellek Almanagi" ku qedexekirina saziyên muxalîf nîşan dide hat weşandin. Pirtûk ji aliyê Hêlîn Bozarslan ve hatiye amadekirin û ji aliyê Weşanên J&J ve hatiye çapkirin.

Li Tirkiyeyê piştî hewldana derbeya 15'ê tîrmeha 2016'an gelek tişt guherîn. Bi vê derbeyê re hikumetê ligel saziyên bi îdîaya di nav derbeyê de cih girtine, saziyên sivîl û yên çapemeniyê ku eleqeya wan bi derbeyê re nîn bû jî girtin. Gelek ji van saziyan jî saziyên kurdan bûn. Hikumetê şevek KHK'yek (Biryarnameya Di Hukmê Zagonê de) belav kir û bi  dehan saziyên sivîl û saziyên çapemeniyê girtin. "Bîrgeha" li ber dest li ser ev saziyên ku navenda Amed bûn rawestiya ye. Hêlîn Bozarslan ev pirtûk bi tirkî û bi piştgiriya aborî ya Sivil Duşunê amade kiriye û Servet Deniz jî edîtoriya wê kiriye.

Bozarslan pirtûk wisa pêşkêş kiriye: "Bîra bajaran jî heye. Bîrgeh bila wekî kedek ji bo sazkirina bîra civakî û wekî bibîranînek li cihek bimîne."

Di pirtûkê, di bin sê beşên wekî "Saziyên sivîl ên hatine girtin", "Saziyên çapemeniyê yên dîtbarî û dîtîjal ên hatine girtin" û "Saziyên perwerdehiyê yên hatine girtin" de saziyên hatine girtin hatine rêzkirin. Ji Komeleya Nivîskarên Kurd, Komeleya Alîkariya Rojava bigire heta ajansa DÎHA, rojnameya Azadiya Welat, kanala ÎMC, kovara Tîrojê saziyên hatine girtin hatine rêzkirin; der barê wan de agahî hatine pêşkêşkirin.

Ji bilî van di dawiya pirtûkê de çend nivîsên nirxandinî jî hatine bi cih kirin. Hevşaredara Amedê Gultan Kişanak a girtî, ji Hafiza Merkezi (Navenda Bîrgehê) Murat Çelikkan, parêzerê girtî Selçuk Kozagaçli, psîkolog Duzgun Ugur, Kordînatora Sosyo Politik Saha Araştirmalari Yuksel Genç û rojnameger Ferît Demîrel bi nivîsên xwe yên nirxandina li ser wê serdemê di pirtûkê de cih girtine.

- Bîrgeh, Bellek Almanagi / Hêlîn Bozarslan / Weşanên J&J / 333 rûpel / 2023