Silêmanî

Bi pêşengiya helbestvana kurd Yade Berzencî û bi beşdariya 24 helbestvanên kurd û ereb yekemîn Festîvala Helbestan a Pîremêrd hate lidarxistin.

Li Hola Mamosta Îbrahîm Ehmed a li Silêmaniyê, bi pêşengiya helbestvana kurd Yade Berzancî, yekemîn Festîvala Helbestan a Pîremêrd hate lidarxistin. Di festîvalê de li ser Pîremêrd hat axivîn û helbest hatin xwendin.

Berzencî di derbarê festîvalê de ji bo Rojnewsê wisa gotiye: “Festîval wê rojek berdewam bike, lê di çarçoveya festîvalê de mêvanên festîvalê wê li cihên dîrokî û geştyariyê werin gerandin. Ji navçeyên başûrê Iraqê 8 helbestvanên ereb, ji bajarokê Xaneqînê 6 helbestvan, her wiha 10 helbestvan jî ji Herêma Kurdistanê beşdarî Festîvalê bûne.”

Helbestvan Meşel Beyatî ku ji parêzgeha Selahedîn beşdarî festîvalê bûye wiha axivî: “Hêvîdarim ev festîval bi serkeftî encam bibe. Festîvalên wiha pêkvejiyana navbera hemû neteweyên li Iraqê jiyan dikin wekî kurd, ereb û tirkmenan zêde dike. Festîvalên bi vî rengî destpêkê pêkvejiyana civakî, piştre wêjeyî, çandî û hunerî xurtir dikin.”

Helbestvan Gulale Pênciwênî jî derbarê Festîvalê de wiha gotiye: “Ev yek ji bo hev nasîna helbestvanên başûrê Iraqê û Herêma Kurdistanê, derfetek baş e ku bi boneya vê yekê fêrî helbestên her du neteweyan dibin.”