Diyarname
Li Helebceyê 8'emîn Pêşangeha Hevguhertina Pirtûkan hat lidarxistin. Beşdarên pêşangehê diyar kirin ku lidarxistina pêşangehên bi vî rengî gelek girİng in û bi rêya van pêşangehan derfet çêdibin ku hîn zêdetir zanyariyên cudatir bi dest bixin û di aliyê zihnî de xwe pêş bixin.

28'ê mehê li Navenda Çalakiyên Ciwanên Helebceyê bi armanca pêşxistin û teşwîqkirina xwendina pirtûkan, 8'emîn Pêşangeha Hevguhertina Pirtûkan hat lidarxistin. Kesên serdana pêşangehê dikin, bêyî pere dikarin pirtûkên xwe bînin bi hinekê din re biguherînin. Di heman demê de du pirtûk jî wekî diyarî hatin pêşkêşkirin. Di pêşangehê de bi sedan pirtûkên cuda yên olî, siyasî, felsefî, civakî û hwd hatin pêşkêşkirin.

Di derbarê armanca lidarxistina pêşangehê de Rêveberê Pêşangehê Erselan Abid ji bo Rojnewsê wisa got: “Pêşangeh ji bo xwendekar û pirtûkhezan wekî derfetekê ye. Xwînerên pirtûkan dikarin pirtûkên li cem xwe hene bînin pêşangehê û bi hinek pirtûkên din re biguherînin. Ev jî derfeteke gelek baş e ji bo xwendekaran .”
Her wiha Erselan Abid diyar kir ku pêşangeh di heman demê de dibe cihê hevdîtina rewşenbîr û xwînerên pirtûkan e û wisa dom kir: “Kesên ku pirtûkên li cem xwe xwendine, tînin pêşangehê bi pirtûkek bi dilê xwe diguherînin. Ev jî tevgereke baş e ji bo xwendina pirtûkan bibe çandek. Her wiha derfeteke baş e jî rewşenbîr û xwendekarên bajêr li vê pêşangehê hev nas bikin.”

Keçikek ciwan a bi navê Barîn Salim ku serdana pêşangehê kiriye jî got: “Min heta niha nêzî 35 pirtûk xwendine. Ez dixwazim îsal vê rêjeyê hîn zêdetir bikim. Min îro jî çar pirtûkên xwe anîne vê derê da ku wan bi hin pirtûkên din re biguherînim. Ez dixwazim bi vê rêyê zanînên xwe pêş bixim û pirtûkên nû jî bibînim. Ez piranî pirtûkên derûnî, olî û felsefî dixwînim.”