Diyarname
Êvara 12'yê mehê li Navenda Mihemed Şêxo ya li Qamişloyê belgefîlmekî li ser jiyana Mihemed Şêxo hat nîşandayîn. Belgefîlmê ku derhêneriya wî Rodî Soman kiriye, ji aliyê Nefel Productionê ve hatiye amadekirin.

Di dema nîşandayîna belgefîlmê bi navê "Bilbilê Xemgîn" de gelek kes amade bûn. Di belgefîlm de ji zarokatî, ciwanî û heta xebata wî ya qada hunerê agahiyên li ser jiyana Mihemed Şêxo hene. Malbat, xizm û hunermendan di belgefîlm de qala Mihemed Şêxo kirine.

Di dema nîşandayîna belgefîlm de birayê Mihemed Şêxo, Beha Şêxo axivî û got: "Me her hêvî dikir ku belgefilmekî li ser jiyana Mihemed Şêxo bê pêşkêş kirin, ku bibe dilopek ji jiyana wî. Ev erk diviyabû Rêveberiya Xweser bi saziyên xwe bi derfetên xwe bikira. Lê gazina herî mezin, em ji başûrê Kurdistanê dikin. Ji ber ku Mihemed Şêxo ji sala 1974 heta 1983’yan derbiderê başûrê Kurdistanê bû. 9 sal ji temenê wî ya li wir jiyayî ne hindik e û haya malbatê jê tune bû, ku li wir e."

Mihemed Şêxo di sala 1948'an de li gundê Xecokê yê Qamişloyê hatiye dinê. Şêxo roja 9'ê adara 1989'an canê xwe dest daye.