Diyarname
Komeleya Lêkolînên Çand, Dîrok û Wêjeya Devkî (SOZDER) sala xwe ya yekê temam kir û ket sala diduyan. SOZDER’ê ji bo salvegera xwe rapora xwe ya xebata salekê ku ji 34 rûpelan pêk tê belav kir.

Rapora SOZDER’ê dema navbera 15’ê gulana 2024’an û 15’ê gulana 2025’an digire nava xwe. Di raporê de çalakî, proje û serdanên komeleyê yek bi yek nîşan dane ku ev xebat hemû ji bo çand û zimanê kurdî hatine kirin.

SOZDER, roja 15’ê Gulana 2024’an ku ev roj rastî Cejna Zimanê Kurdî tê hat damezrandin û di heman rojê de panelek bi navê “Roja Zimanê Kurdî” li dar xist. Ev çalakî bû destpêka xebatên komeleyê yên ji bo ziman û çanda kurdî.
Di nava salekê de, SOZDER bi çalakiyên cur bi cur ên wekî beşdariya festîvalan, atolye û pêşangehan, wêjeya devkî ya kurdî gelek çalakî çêkirin. Her wiha, serdanên rewşenbîr û saziyan, arşîvkirina gelek argûmanên devkî û tora hevkariyê jî hin xebatên din in ku SOZDER’ê di salekê de kirin.

Bi hevkariyên navxweyî û navneteweyî, komele di warê parastina ziman, wêjeya devkî û dîroka çandî ya kurdî de roleke sereke lîst. Atolyeyên wêjeya devkî û çalakiyên perwerdehiyê yên ji bo ciwanan, mîrata çandî bo nifşên nû veguhast. SOZDER ji bo dema nû armanc dike ku bi projeyên nû, wekî dîjîtalkirina mîrata devkî xebatên xwe bidomîne.

Rêveberiya Komeleyê diyar dike ku di salên pêş de dê xebatên xwe berfirehtir bikin û bi projeyên arşîvkirin û dîjîtalkirinê, çanda kurdî bi awayekî eşkere belav bike.