Amed
Li Amedê komeleyeke bi navê SARMAŞIK heye ku alîkariya kesê xizan dike. Lê di van demên dawî de rayedarên dewletê ev komele daye bin lêpirsîn û çewsandinê. Ji bo piştgiriya komeleyê heyetek ku ji rêveberên Şaxa ÎHD'a Amedê pêk dihatin çûn serdana komeleyê. Di nav heyetê de Serokê ÎHD'a Amedê Raci Bilici, Nûnerê Herêma Rojhilat û Başûrê Rojhilat ê ÎHD'ê Şevket Akdemîr û rêveberên ÎHD'ê Guneş Perinçek û Emin Ermin hebûn ku çûn serdana Sarmaşikê.  Serokê Giştî yê Komeleyê Selçuk Mizrakli, Sekreterê Giştî yê Komeleyê Şerif Camci û Jimarkarê Giştî yê Komeleyê Mehmet Işiktaş pêşwazî li heyetê kirin.

Di serdanê de Racî Bilici wisa got: "Hikumet polîtîkayeke ku mirovan birçî û feqîr bihêle dimeşîne. Tam di rewşeke wisa de Komeleya Sarmaşikê di asteke gerdûnî de xebata xwe dike. Ev jî ji bo me gelek girîng e û em bi hemû hêza xwe piştgiriyê didin komeleyê."

Serokê ÎHD'a Amedê Bilici got ku di van demên dawî de alîkariyên ji komeleyê re tên pêşî li wan tê girtin û bi vî awayî komele dikeve nava rewşeke dijwar. Bilici wisa got: "Ger dixwazin komeleyê bixin nav rewşek dijwar em jî heta ji destê me tê em piştgiriya wê bikin. Em her meh 10 lîra jî bidin emê vê komeleyê mezin bikin. Gelê me dikarin dest ji cixareyê berdin û ew pereyê cixareyê bidin vê komeleyê. Em bang li hemû gel û saziyan dikin ku piştgiriyê bidin Komeleya Sarmaşikê."