Amed
Serketiyên xelatên "7'emîn Pêşbaziya Nivîsandina Lîstikên Şanoyê ya Evdirehîm Rehmî Hekarî" hatin xelatkirin.

Piştî 9 salên kayûman îsal şaredarî pêşbazî da dest pê kirin. Ev cara 7'an bû ev pêşbazî lidar dikeve. Îsal bi giştî 45 tekstên şanoyê ji bo pêşbaziyê hatin şandin û vê êvarê bi berasimek kesên serketî li Şanoya Bajarê Mezin hatin xelatkirin. Pêşkêşvariya merasimê şanoger Omer Şahîn kir. Kesên bi ser ketin xelatên xwe girtin.

Di pêşbaziyê de Îbrahîm Kazimî bi berhema xwe "Kela Dimdimê" bû yekem. Berat Şahînbeyoglû bi berhema xwe "Siyabend" bû duyem û Ahmet Bîlge jî bi berhema xwe "Heyran Ka Em jî Siyaset Bikin" bû sêyemîn. Her wiha Mesût Arif jî bi berhema "Dîno" hêjayî xelata mansiyonê hat dîtin.

"Evdirehîm Rehmî Hekarî di vî warî de dîrokî ye"
Birêvebirê Şanoya Bajarê Mezin a Amedê Tahîr Baykuşak ji bo Rûdawê axiviye. Baykuşak bal kişandiye ser girîngiya dîrokî ya Evdirehîm Rehmî Hekarî û gotiye: "Evdirehîm Rehmî Hekarî sala 1919'an teksta yekem a şanoyê ya Kurdî nivîsandiye û li Stenbolê di hejmarên 15 û 16'an ên Kovara Jînê de weşandiye. Di vî warî de Evdirehîm Rehmî Hekarî gelekî dîrokî ye. Ji bo pêşbaziyê ji çar parçeyên welêt serlêdan çêbûn. Ji Bakur, Başûr, Rojava, Rojhilat û ji diyasporayê serlêdan hebûn."

"Çavên nifşên paşerojê li me ne"
Xelatgirê Pêşbirkê Mesût Arif jî diyar kiriye ku barê wan giran e û gotiye: "Rûyê me, dengê me, azarên me û hewarên me gelek in. Ji ber vê yekê barê me girantir e û divê em li van tiştan xwedî derkevin. Çavên zarok, ciwan û şanogerên paşerojê li me ne ka em dê ji wan re çi mîrateyê bihêlin."

Xelatgirê duyem Berat Şahînbeyoglu jî kêfxweşiya xwe anî zimên û got: "Bila şanoya kurdî mezintir bibe. Ez ji ber qedrê ku didin şanoya Kurdî spasdar im."

"Me 20 puan li ser ziman dan"
Nivîskar, derhêner û lîstikvanê Dihokî Helket Îdrîs Abid ku yek ji endamên juriyê bû li ser girîngiya bikaranîna ziman sekiriye û gotiye: "Di pêşbaziya îsal de me cara yekem 20 pûan li ser ziman dan. Me pûan nedan tekstên ku zimanê wan ne baş bûn. Dibe ku çîrok baş bû, teknîk baş bû lê ji ber ku zimanê kurdî ne baş bû me pûan nedanê. Loma jî ev pêşbazî dibe sedem ku nivîskar bi taybetî di aliyê ziman de xwe hinekî zêdetir biwestînin û xwe bi pêş bixin."

Wekî kevneşopiya pêşbaziyê, hemû tekstên ku ji bo pêşbaziya 7'emîn hatine şandin dê wekî pirtûk bên çapkirin û li arşîva şanoya kurdî bên zêdekirin.

**

Nûçeya Eleqedar:

- Pêşbaziya Lîstikên Şanoyê ya Evdirehîm Rehmî Hekarî dest pê kir