Diyarname
Weqfa Îsmaîl Beşîkçî li ser hin gotinên di demên dawî de hatine belavkirin daxuyaniyeke nivîskî belav kir û got, “Em eşkereyî diyar bikin ku tu têkiliya van îdiayan bi agahî, erêkirin an jî helwesta saziya me re nîn e.”

Weqfê di daxuyaniya xwe de got, “Di van rojên dawî de tê dîtin ku li ser navê Weqfa İsmail Beşikci, di hin mecra û qadan de hinek îdîayên ku rastiyê nîşan nadin têne belavkirin. Berî her tiştî em dixwazin bi eşkereyî diyar bikin ku tu têkiliya van îdiayan bi agahî, erêkirin an jî helwesta saziya me re nîn e” û wiha dom kir, “Mijarên ku ji raya giştî re hatine ragihandin û bûne sedema nîqaşê, tenê ji nirxandinên rexneyî yên İsmail Beşikci yên sala 2004’an ên der heqê Abdullah Ocalan û bersivên ku wî dane van nirxandinan pêk tên û girêdayî çarçoveyeke dîrokî ya diyarkirî ne. Belavkirina bûyereke ku beriya bîst salan qewimiye, bi qutkirina ji çarçoveya wê û anîna wê ya di nav şert û mercên siyasî yên îro de, ne exlaqî ye û ji bo xapandina raya giştî ye. Eşkere ye ku armanca van hewldanan ew e ku rastiyên di dîrokî de berovajî bikin û ji nîqaşên siyasî yên rojane re sedeman û hincetan hilberînin.”

Weqfê gotiye  weqfa wan li gor prensîbên avabûnê ew saziyeke ku li ser dîrok, çand, ziman û avahiya civakî ya kurdan lêkolînên zanistî dimeşîne; hilberîna akademîk û ramana rexneyî esas digire, û wiha gotiye, “Weqfa me ne parçeyekî tevgereke siyasî, nîqaşeke polîtîk a rojane yan jî alîgiriyekê ye. Weqif xwedî helwesteke akademîk a ser-siyasî ye û li hemberî hemû beşên civaka Kurd xwedan heman helwestê ye. Ji ber vê yekê, ji çarçoveya wê qutkirina bûyereke berê û kirina wê ya parçeyekî polemîkên siyasî yên rojane, ne li gorî bi prensîbên saziya me ye. Her wiha em dixwazin diyar bikin ku İsmail Beşikci niha bi pirsgirêkên xwe yên tenduristiyê re mijûl dibe; dema tenduristiya wî rê bide, ew ê di mijarên ku pêwîst bibîne de ramanên xwe bi xwe bi raya giştî re parve bike.”