Diyarname
Heta niha zêdetirî 500 kamyonên alîkariyê gihîştine Kantona Cizîrê û ev alîkarî tê belavkirin.
Va ne agahî:
- Berhevkirina alikariyê ji bo koçberên li Kantona Cizîrê didome. Saziyên ji Ewropayê, saziyên xêrxwazî yên ji Başûr û xebata Rêveberiya Xweser di vî warî de didome.
- Weqfa Barzanî ya Xêrxwaziyê, Rêxistina Xêrxwaziyê ya Kerkûkê, Rêxistina Hana, Yekîtiya Bijîşkên Kurd a Almanyayê, Bloka Helwesta Kurdistanê, Kanal 8, Kanala Rûdaw û Rêxistina Xêrxwaziyê ya VIM û gelek rêxistinên din ji bo alîkariyê heta niha ketine nava hewldanan.
- Alîkarî bi hevkariya Heyva Sor a Kurd û Meclisa Koçberên Efrîn û Şehbayê tê belavkirin.
- Li gorî komîteyên têkildar, zêdetirî 500 kamyonên alîkariyê gihîştine bajar û bajarokên kantonê.
- Alîkarî ji xwarin, pêdiviyên bijîşkî, pêdiviyên zarokan, betanî, doşek û alavên germkirinê, pêk tê.
- Rojane xwarinên germ ji bo koçberan tên dayîn.
- Der barê sotemeniya germkirinê de, heya niha li zêdetirî 11 hezar malbatan hatiye belavkirin, bi tevahî nêzîkî 300 hezar lître li stargehên koçberan hatiye belavkirin.
- Rêveberiya Xweser belavkirina sotemeniyê hem li ser koçberan û hem jî li ser şêniyên kantonê berdewam dike.
- Navendên tenduristiyê û klînîkên rêxistinên mirovî heta niha alîkariya bijîşkî dane zêdetirî 5 hezar kesan.

'DIVÊ DORPÊÇA KOBANÎ RABE Û ALÎKARÎ BÊ'
Hevserokê Desteya Kar û Barên Civakî ya Kantona Firatê Ehmed Xoce jî ji bo ANHA'yê li ser Kobanî wisa gotiye:
- Gelê ku ji Reqa, Tebqayê hatine, dîsa ji Şêxmeqsûd û Girê Spî ên ku berê li Til Seminê bûn, niha hejmareke zêdetirî 500 hezar kes li bajarê Kobanî dijîn.
- Kesên ku koçber bûn û hatin Kobanî, malbatên Kobanî di malên xwe de 4 an 5 malbat pêşwazî kirin. Ev yek jî dîsa têra malbatên koçber nake. Ji ber vê yekê nêzî 70 cihên wekî dibistan, mizgeft, baxçeyên zarokan, eywanên dawetan û hemû dikanên vala hatin vekirin, ji bo ku koçber tê de bi cih bibin, lê dîsa jî têra koçberan nake.
- Tevî dorpêç û koçberiya li Kobanî, heta niha tu alîkariyên xurekê nehatine. Sotemenî, şîrê zarokan, derman li Kobanî nema ye, her tişt êdî heta şîrê zarokan li dikanan nayên peydakirin. Ji ber dorpêça herî giran êdî li Kobanî dikan hemû vala bûne. Ya herî girîng şîrê zarokan e. Divê korîdoreke mirovî ji bo Kobanî were vekirin.