Diyarname
2'yemîn Rojên Pirtûkan a Erxeniyê îsal di navbera 7-10'ê mehê de li dar dikeve.

YEWKURD (Yekîtiya Weşangerên Kurd), Egîtîm Sena Şaxa 3'yemîn a Amedê û Şaredariya Erxenî bi hev re Rojên Pirtûkan organîze dikin. Ev xebata ku par rastî eleqeyeke baş hatibû, wê li Park Ormanê ya Taxa Yenîşehîra Erxeniyê li dar bikeve. 

Îsal 40 weşanxane wê standê vekin. Dor 60 nivîskarî wê li Rojên Pirtûkan derkevin pêşberî xwendevanên xwe. Bi giştî 23 gotûbêj û panel wê li dar bikevin.

Hevşaredara Erxeniyê Bîrsen Azak Bayar ji Ajansa Welat ji bo Gulîzar Turko axiviye. Bayar li ser armanca vê xebatê dibêje: “Armanca me ya sereke ew e ku em li dijî polîtîkayên şerê taybet, ên ku bi taybetî li ser ciwan, keç û xortên me tên meşandin, bisekinin. Her ku ciwanên me ji dîrok û nasnameya xwe dûr dikevin, ew qas zêdetir dikevin nav pencên vê pergala qirêj. Ji ber vê sedemê, me wekî rêveberiya şaredariyê, pêwîst dît ku em Rojên Pirtûkan ên Duyemîn li dar bixin.”

'CIVAKA DEMOKRATÎK BI XWENDINÊ TÊ AVAKIRIN'
Hevşaredar Bayar dibêje "Çiqas ku ciwanên me pirtûkan bixwînin û xwe nas bikin, ew ê ew qas baştir pêşeroj û dîroka xwe fêm bikin" û van lê zêde dike, "Heke ciwan nexwînin, nenivîsin û dîroka xwe fêm nekin, avakirina civakeke demokratîk nabe armanceke pêkan. Ev pergal tenê bi zanebûna pêşeroja xwe, bi xwendinê û bi nasîna dîrok û zimanê xwe tê avakirin.”

'DIVÊ CIWANÊN ME BIXWÎNIN JÎ'
Li ser ziman jî Hevşaredara Erxeniyê Bîrsen Azak Bayar wisa dibêje, "Ziman çiqas dewlemend be, avakirina jiyanê jî ew qas dewlemend e. Her ku dayikek bi zimanê xwe bi zarokê xwe re biaxive û zarok bi zimanê dayikê bixwîne û fêm bike, dê pêşeroja wî zarokî ew qas ronîtir bibe. Pêwîst e em tenê bi axaftinê sînordar nemînin; divê ciwanên me bi xwendinê xwe ava bikin.”