TETWAN
58'emîn Mîhrîcana Çand û Hunerê ya Tetwanê ku bi diruşma “Li Tetwanê çand heye, huner heye, em hene” tê li darxistin didome. Ji ber salvegera Komkujiya Şengalê di bernameya îro tu konser tune bûn.
Di roja 4'emîn a mîhrîcanê de panelên bi mijarên ‘Tundiya çandî ya nexuyayî’ û ‘Rêbazên çandî yên ji nû ve avakirinê’ li avahiya Konservatûarê ya Şaredariya Tetwanê hatin li darxistin.
Di panela ‘Tundiya çandî ya nexuyayî’ de Hevseroka Komelaya Çand, Huner û Wêjeyê ya Jinan (KASED) Salîha Ayata wekî panelîst axivî. Nivîskar Dilawer Zeraq jî li ser mijara ‘Rêbazên çandî yên ji nû ve avakirinê’ nirxandin kirin.
‘Çand ji bo kurdan qada xwe îfadekirinê ye’
Di panelê de destpêkê Salîha Ayata axivî. Ayata pêşî Komkujiya Şengalê ya ku di 3'yê gelawêja 2014'an de, ji aliyê DAÎŞ'ê ve li Şengalê li ser civaka Êzidî hatibû pêkanîn şermezar kir û got: ’Mîhrîcan li ser çandê tên lidarxistin. Çanda me jî bi salan e di bin qirkirinê de ye. Ev qirqirin car car bi tundiya sembolîk car car jî bi tundiya çandî dimeşe. Meseleya çandê ji bo kurdan meseleyeke pir girîng û kur e, ev sed salên dawiyê çand ji bo kurdan li bakurê Kurdistanê qada xwe îfadekirinê ye. Qada xwe parastinê ye. Helbet dewletê jî li hember vê parastinê şerek meşandiye. Di vî şerî de gelek metodên tundiyê bikar aniye. Kurd tenê rastî tundiya fizîkî nayên, bi awayekî eşkere rastî tundiya sembolîk û ya çandî tên.”
‘Çand li ser mekanekî xwe heyî dike’
Piştre nivîskar Dilawer Zeraq wekî panelîst axivî. Dilawer Zeraq li ser têkiliya çand û mekan sekinî û got: “Çand li ser mekanekî ava dibe, tiştekî ber bi çav e. Çand li ser mekanekî xwe heyî dike, ev mekan jî jo bo me Kurdistan e. Rabûn û rûniştina me irf û edetên me, muzîk û govenda me çanda me ne. Lê çanda kurdan ne tenê ji muzîk û govendê pêk tê. Awayê fikirîna gelekî jî çanda wî gelî ye.”
‘Înkarkirina çandê faşîzma çandî bi xwe re tîne’
Zeraq di berdewama axaftina xwe de, da zanîn ku çanda kurdan çandeke qedîm e û wiha dom kir: “Çanda kurdan ne ji ber ku tune ye tê înkarkirin, berovajî vê ji ber ku çandeke pir qerase, kûr heye serdest nikarin xwe bigihînin vê astê çanda kurdan înkar dikin. Dema hişmendiyeke demokratîk tune be mirov çandên derveyî xwe înkar dike, ev jî faşîzma çandî bi xwe re tîne. Kemalîzmê di destpêkê de em wekî mirovên polîtîk, xwedî hiş, wekî gel qebûl nekir. Yekî deh sal berê digot kurd dikarin bi zimanê xwe lorikên xwe bibêjin. Ev hişmendî hişmendiyeke kulturalîzekirinê ye.”
Piştre li eywana Sinemayê ya Yaşam AVM'yê fîlmê Rêzan Demirbaş ê bi navê “Ûçan Kofteci” hat nîşandan.
Nivîskar Dilawer Zeraq: “Çand li ser mekanekî xwe heyî dike, ev mekan jî jo bo me Kurdistan e."
**
Nûçeya Eleqedar:
.jpg)
.jpg)
.jpg)
