AMED

Hevserokê BDP'ê Selahattîn Demîrtaş da xuyakirin ku hewl tê dayîn pirsgirêka kurd a 100 salan bi rêbazeke bêçek bê çareserkirin û got, "Di rewşeke bi vî rengî de nayê qebûl kirin ku malbat pirsgirêkên xwe bi çekan çareser bikin." Demîrtaş banga aramî û berpirsyariyê li malbatan kir.

Hevserokên BDP'ê Selahattîn Demîrtaş û Gultan Kişanak, li gel Şaredaran, Nûnerên Rêxistinên Civakî yên Sivîl û heyetek ji BDP'ê, çûn sersaxiya xizmên 8 kesên ji malbata Tekîn û Ûgûrlayan ên li gundê Helhela Hezroyê di pevçûnê de hatin kuştin.

Demîrtaş û Kişanak ên li navçeya Bismilê ji aliyê partiyiyan ve hatin pêşwazîkirin, çûn serdana sersaxiya Malbata Ûgûrlûyan ku 4 ferdên wan hatin kuştin. Heyetê, li Mizgefta Gundê Ûlûturkê bi mezinê malbatê Abdûrrahman Ûgûrlayan û ferdên din ên malbatê re axivî û ji bo wan hêviya aramiyê kir. Abdûrrahman Ûgûrlayan ji heyetê re got, "Hûn bi xêr hatine. Li ser serê me cihê we heye. Em vê meselê êdî ji we re dihêlin. Wekî partî hûn çi bikin, çi biryarê bistînin, emê li gorî wê tevbigerin."

Hevserokê BDP'ê Selahattîn Demîrtaş jî xemgîniya xwe ya ji ber bûyerê anî ziman û diyar kir ku di demên dawî de bi awayekî anormal di pevçûnên nava malbatan de zêdebûnek rû daye û ji bo balê bikşînin ser vê rewşê û sersaxiya malbatê bikin, ew li gel Rêxistinên Civakî yên Sivîl hatine. Demîrtaş got, "Em pevçûna navbera malbatan de qebûl nakin. Sedema wê çi dibe bila bibe, di şûna axaftin û diyalogê de em naxwazin ku mirov hewl bidin pirsgirêkên xwe bi çekê çareser bikin. Wekî partî em hewl didin pirsgirêkeke 100 salan bi axaftin û diyalogê çareser bikin. Di rewşeke ku me pevçûnên ji ber şer ji sedî sed rawestandine de, em pevçûnên navbera malbatan qebûl nakin. Di rewşeke ku em hewl didin aştiyê têkûz bikin de, nayê qebûlkirin ku gelê me li hemberî hev çekê bikar bîne. Divê em pirsgirêkên xwe bi axaftin û diyalogê çareser bikin. Di vê mijarê de partiya me di xizmeta gelê me de ye. Komîsyonên aştiyê yên partiya me hene. Bi serlêdana li komîsyonên me re, pirsgirêk bêyî pevçûnan dikarin werin çareserkirin."

Çareserî muzakere û diyalog e 

Heyet li Helhelê ji aliyê malbata Tekin û gundiyan ve hat pêşwazîkirin. Di ziyaretê de Hevseroka Giştî ya BDP'ê Gultan Kişanak, sersaxî ji bo malblatê re xwest û diyar kir ku ev bûyerên bi vî rengî wan xemgîn dikin û dixin nava fikaran. 

Selahattin Demirtaş jî û wiha got: "Di demên dawî de şerê di navbera gundiyan de zêde bûye û ev ne ji rêzê ye. Li Êlih, Mûş û herî dawî li Lice Hezro, Farqînê şer pêk hatin û herî kêm 30 welatiyan jiyana xwe ji dest dan. Ev ne bûyerên ji rêzê û ji xweber in. Ev encama polîtîkayên salan e li ser kurdan tên meşandin. Dixwazin bi vê yekê re têkoşîna azadiya gelê kurd vala derxin. Em van bûyeran qet qekbûl nakin. Kesên dixwazin tevna civakî ya kurdan xera bikin vê pêvajoya ku PKK'ê û Rêberê Gelê Kurd Abdullah Ocalan daye destpêkirin ji xwe re dikin firsenda berjewendiyê. Lê bila her kes zanibin kesên dixwazin alozî û tevliheviyê bikin dê têkoşîna wan bê encam bimîne. Di pirsgirêka kurd de 50 hezar mirov hatin kuştin. Çareseriya vê yekê muzakere û diyalog e.

Heyet herî dawî malbata li taxa Kale ya Farqînê dimîne ziyaret kir.  

Çend roj berê di navbera malbata Ûgûrlûyan û Tekin de pevçûna çekdarî çêbûbû, ji her du malbatan nêzî deh kesî ji wan hatibûn kuştin û hin jî birîndar bûbûn.