Diyarname

Endamên Koma Çarnewa ku ev kom di nav muzîka kurdî de xwedî cihek girîng bû daxuyaniyeke weşandin û gotin komê dawî li xebatên xwe aniye.

Daxuyanî ji aliyê endamên komê Dr.Fikri Kutlay, Dr.Ahmet Kaya û Suleyman Çarnewa ve hate dayîn. Di daxuyaniyê de hate gotin ku Çarnewa di sala 2000'î de li ser hîm û mîrasa Koma Amed, ji aliyê Dr. Fîkrî Kutlay, Dr.Ahmet Kaya, Serhat Çarnewa (Serhat Karakaş), Suleyman Çarnewa (Suleyman Gultekin) û Memo Gul (Memo Gul, piştî sala 2001'ê ji komê veqetiya) ve hate damezirandin û albumên bi navê "Sî", "Mak", "Zîz" derxistin.

Di daxuyaniyê de sedema dawîlêanîna xebatên komê wisa hate gotin: "Prensîbên xebatên koman di warê  hunerî da yên herî girîng, rêgez, bi hev re afirandin, parvekirina şexsî ku ev yek li cem me bi dawî bûn û ya herî girîng jî nêrîna li hunerê ya me cuda bûye ku ev yek bi awayekî neyînî bandorê li komê dike."

Hat gotin ku ev du sal in bi awayekî jixwe ber xebatên komê sekinîne û ji îro pê ve dê kom bi hev re xebatê neke û kesek tenê jî nikare li ser navê komê xebatê bike. Komê bi van gotinan dawî li daxuyaniya xwe anî: "Ji îro pêde, ji aliyê hiqûqî, hunerî, madî û manewî ku ev çar kes xwedî maf in û  

destûra wan her çaran bi hev re nebe, endamên komê bi seré xwe nikarin li ser navê ÇAR NEWA muzîkê çêbikin û tiştek wisa bikin jî ev tişt ne qanûniye û nayê qebûlkirîn jî. Destûriya van çar endeman nebe, li ser navê ÇAR NEWA, çêkirina konser, çalekiyên hunerî, bernameyên tv, radîo, klîp,cd û hemû karên hunerî tê maneya binpêkirina hiqûqê, prensîbê û nirxên etîkê."