QAMIŞLO

Di civîna ji bo rêveberiya demkî ya rojavayê Kurdistanê ku bi beşdariya pêkhateyên kurd, ereb, çeçen û xiristiyan hate lidarxistin de, ji bo xebatên rêveberiya demî ya Rojava meclîsek hate avakirin.

Civîna ji bo rêvberiya demkî 2 roj berê li bajarê Qamişlo dest pê kiribû. Piştî navbera 2 rojan îro civîn dîsa li dar ket û bi encam bû. Civîna ku li Salona Rewabî hate lidarxistin nêzî 3 saetan dom kir.

Di encama nîqaş û nirxandinên li ser projeya rêveberiya herêmî ku PYD’ê pêşkêş kiribû de, ji bo rêveberiya demkî Meclisa Avakirina Rêveberiya Giştî ya Rojava hate avakirin. Meclis ji 82 endamên ji nûnerên kurd, ereb, çeçen û xiristiyanan pêk tê.

Derbarê biryarên hatine girtin de Endamê Dîwana Meclisa hatiye avakirin Hekem Xelo agahî dan ANHA’yê.

Xelo got ku wan li ser projeya PYD’ê ku herêmên Rojava wekî 3 herêmên kanton (xweser) diyar dike nîqaş meşandine. Hekem Xelo, diyar kir ku di bin banê Meclisa Avakirina Rêveberiya Giştî de jî Desteya Şopandina Pêkanîna Rêveberiya Demkî hatiye avakirin û ev deste ji 55 kesên ji kurd, ereb, çeçen, xiristiyanan pêk tê.

Xelo got ku ev Meclis wê amadekariyên avakirina rêveberiya herêmî bike û wiha dom kir: “Li gorî projeye hatiye pêşkêşkirin herêmên Rojava dê wekî herêmên kanton ên Efrîn, Kobanê û Cizîrê bê destnîşankirin. Her herêmek kanton wê meclisa xwe ava bike û di meclisa giştî de bê temsîlkirin.”

Xelo meclisa wan demborî ye û peywîra wê meşandina xebatên îlankirina rêveberiya demkî û amadekariyên hilbijartinan e. Xelo got ku her wiha emê bi pirsgirêkên parastin, siyasî û aborî re jî mijûl bibin.