Cemil Oguz

Li dinyayê yekemîn car dengbêjên kurd û rockvan li heman sahneyê bi hev re striyan. Ji rockvanan Jon li ser konserê wisa got: "Ez kesekim ku ji muzîkê pir hez dikim. Ji ber ku îşev ez parçeyeke vê konserê bûm asoya min fireh bû."

Bi hevkariya Navenda Çanda Mezopotamya (NÇM) û Newyork Produksiyonê dengbêjên ciwan Mihemedê Serhedî, Mem Bazîd û Koma Story Boks û Jon Simpson hatin cem hev.

Dengbêjî li ku, rock li ku? Yek muzîka ji Mezopotamyayê, muzîka gelê ku zimanê wî hatiye qedexekirin, stranên wî hatine qedexekirin; yek jî muzîka gelên hatine çewsandin, muzîka serhildêran lê li ser erdnîgariyeke ku ji Mezopotamyayê gelek dûr. Û ev her du muzîk li Stenbolê, li NÇM'ê li heman sehneyê derketin pêşberî hunerhezan.

Berî konserê pirs ev bû di bîra her kesî de; "Dengbêjî û rock bi hev re dibin?" û piştî konserê bersiv 'dibin' bû û temaşevan jî, dengbêj jî, rockvan jî, yanê bi kurtahî her kes memnûn bû.

Ji Evdalê Zeynikê heta Cembelî

Pêşî dengbêjên ciwan Mihemedê Serhedî û Mem Bazît derketin ser dikê. Serhedî bi "Qazê" dest pê kir, dûre klama Cembelî got, temaşevan birin zozanîn Culemêrgê, çîroka evîna Cembelî û Binevşa Nanîrênê pêşkêşî wan kir. Dûre Mem Bazî ji denbgêjê mezin, pîrê dengbêjan Evdalê Zeynikê girt klama "Qulng", dûre klama navdar "Lawikê Metînî" xwend. Piştre Serhedî "Hesenîko" xwend, Mem Bazît bi klama "Geliyê Zîlan" para ku ji bo wan hatibû veqetandin temam kir.

Piştî dengbêjan koma rockê Story Boks derket derket ser dikê. Klamên dengbêjan her yek xwedî çîrokekê bûn, yê rockvanan jî bi vî rengî bû vê şevê. Wan qala çîroka stranên xwe kirin, dûre gotin stranên xwe yên rockî bi gîtar, saksafon, batery û perkusyonan.

Ji endamên Story Boks Charles dibêje, "Ji zarokatiya min ve min hez dikir ku bavê min ji min re qala çîrokan bike; a rast carinan wî ji ber xwe ve jî ew çîrok digotin. Çîrok baş in, coşê didin mirovan û ger bi muzîkê re bibin yek baştir dibin" û çîrokên xwe û muzîka xwe bi hev re girê dide di muzîkariya xwe de. Her klama dengbêjan jî xwedî çîrokekê ye û wan klaman û muzîkê di nav hev de dihonin. Ev her du nêzîktêdayînên nêzî hev îşev bi hev re li ser heman sehneyê bûn.

Koma Story Boks bi strana “Tilting at Windmills” dest bi konsera xwe kir, dûre ji MFO bi tirkî “Gullerin içinden” xwendin û paşê “The Borderline”, “Writer”, “Olivia”, “Talking Now”, “Kingdom Come” pêşkêş kirin. Di dawiyê de jî dengbêj Mihemedê Serhedî derket ser dikê, "Mîrpence" xwend, koma rockê jî jêre li enstrumanên xwe da, bi hev re şirîkatî dikin dengbêjî û rockê û şev bi duetan wan bi dawî bû.

Dengbêjî di asta dinyayê de ye

Piştî konserê me bi dengbêjên ciwan Mihemedê Serhedî, Mem Bazîd û nedamên koma Story Boks Jon û Charles re xeber da.
Dengbêj Mihemedê Serhedî li ser konserê got: "Dengbêjî ne tenê muzîkeke herêmî ye. Dengbêjî muzîka cîhanê ye. Ispata vê jî ev e ku îşev tevî muzîkarên ji Amerîka, Zelandayê li heman sehneyê bû. Ez hêvî dikim  di dema pêş de dengbêjî bigihîje cihê ku layiqê wê ye. Bi ya min ger muzîkar hev fêm bikin dikarin gelek karên baş bikin, îşev jî wisa bû. Min bi xwe jî zewqek mezin ji konserê girt."

Dengbêj Mem Bazîd jî wisa dibêje, "Heta niha dengbêjî li gundan dihat vegotin, bi vê konserê me nîşan da em dikarin bi dinyayê re jî bibêjin. Ev tişteke girîng e."

Jon: Dengbêjî ez hestiyar kirim

Ji endamên koma Story Boks Charles dibêje, "Yekem car hefteya borî me dengbêjî bihîst" diyar dike ku çend caran proja kirine û ji komê Jon jî wisa dibêje; "Bi ya min ev muzîk gelek bi heyecan e, heta niha min tişteke wisa nebihîstibû. Di dema klam gotinê de hesta ku lê bar dikin gelek tesîr li min kir û ez hestiyar bûm."

Pirsa ku her hate pirsîn, "dengbêjî û rock li cem hev dibin?" Jon dibêje, "Dibin" û Charles lê zêde dike: "Ez bawerim qelîteya rockvanan di vî warî de gelek muhîm e. Rastî ev e. Dengbêjî ji rocakê gelek cuda ye. Tişteke zor e ku rockvanek wekî dengbêjek bibêje lê wekî muzîkal dikarin li cem hev bin."

Wan yekem car li dengbêjî guhdarî kirine. Jê hez kirine yan na? Ji wan Jon wisa bersivê dide, "Ez kesek im ku gelek ji muzîkê hez dikim. Ji ber ku ez îşev parçeyeke vê konserê bûm asoya min gelek fireh bû." Û Charles jî bi gotina "Yê min jî" beşdarî hevalê xwe dibe.

***

Bi şertê nîşandayîna çavkaniyê her kes dikare nûçe û nivîsên Diyarnameyê bikar bîne. Bêyî nîşandayîna çavkaniyê bikaranîna nûçe û nivîsên Diyarnameyê qedexe ye.