Diyarname

Ji bo parlemena Iraqê îro li Iraqê û herêma Kurdistana Federe hilbijartin li dar ket. Li gor hejmara fermî 21 mîlyon û 400 hezar hilbijartin hene. Bi giştî 9 hezar berendam ketin hilbijartinê, ji wan dê 328 kes bêne hilbijartin. Cîgirê Lijneya Bilind a Hilbijartinê ya Iraqê Mîqdad Şerîfî got ku beşdariya hilbijartinê li dor sedî 70 çêbûye. Her wiha got ku 12 mîlyon û 101 hezar kesî dengê xwe daye. Dema hejmara hilbijêran 21 mîlyon be bi van reqeman çawa sedî 70 beşdarî çêdibe wekî pirsek li hewa ma. Tê texmînkirin ku rêjeya beşdarî li dor sedî 60 çêbûbe. Encam di rojên pêş de dê bêne diyarkirin.

Hêzên DYA'yê di sala 2011'an de ji Iraqê vekişiyan. Piştî wê ev yekem car e hilbijartin li dar dikeve. Ji bo hilbijartinê 36 koalîsyon çêbûn, 71 komên siyasî hatine ba hev û bi awayekî lîste çêkirine. Li Iraqê di warê koalîsyon û lîsteyan de tevliheviyeke gelek mezin heye. Li gelek bajaran lihevkirina ku di nav hin koman de çêbûye, heman koman li bajarên din heman lihevkirin çênekirine.

Li Herêma Kurdistanê ku di hilbijartinên berê de li ser yek lîsteyê li hevkirin çêbûbû û bi vî awayî beşdarî hilbijartinê bûbûn, vê carê yek lîste çênebû. Loma jî YNK, Goran û PDK her yek bi lîsteya xwe beşdar dibin.

Li gor beşa tirkî ya Al Jazeera Serokwezîrê Iraqê Nûrî Malîkî piştî dengê xwe da wisa axivî: "Digotin hêza Lijneya Bilind a Hilbijartinê ya Iraqê nîn e ku hilbijartinê îdare bike. Digotin lijne bi alîkariya biyaniyan tevdigere. Vaye îro em hilbijartina xwe ya duyemîn li dar dixin. Em bi awayekî serketî hilbijartinê bi rê ve dibin. Ji hilbijartinê berê baştir e."

Li hin herêmên Enbar a Iraqê hilbijartin li dar nakeve. Ji ber ku rewşa ewlehiyê xirab e.

Li gor hin anketan "Koalîsyona Dewleta Hiqûqê" ya ku Serokwezîrê Iraqê Malîkî pêşengê wê ye dê bi awayê serketî derê. Li aliyê şiîyan komên Mukteda Sadr, Ammar el-Hekim û İbrahim el-Caferi pêşengî dikin bi hêz in.

Li aliyê suniyan jî komên ku Usame Nuceyfi, İyad Allavi û Salih Mutlaq pêşengiya wan dikin bi hêz in.

Di encama hilbijartinê de li bendê ne ku koalîsyoneke saz bibe. Tê gotin ku tu partiyek bi qasî ku bi serê xwe bibe desthilatdar dê dengan negire. Di hilbijartina dawî ya ku 7'ê adara 2010'an de li dar ket tu partiyek bi serê xwe dengên mezin negirtibûn. 

Serokê Koalîsyona Neteweyî ya laîk Iyad Allavî piştî dengdanê ji bo televîzyona El Şerqiye wisa gotiye: "Piştî hilbijartinê dê zehmet hikumet çêbibe. Ji ber ku hemû partî xurtir ketine hilbijartinê û parçebûna di navbera wan de jî gelek e."