Bi yek derbê agir kete nav rojeva gelê kurd de. Agirê ku li jînwarên gundên Şemrex û Çinarê pêket, şewateke mezin li heremê pêk anî. Bi şewatê re dilê me kurdan tev êşiya û di encamê de heta niha 15 kesî canê xwe ji dest dan û gelek kes jî hêj birîndar in. Bi şewatê re tibabek qutê gundiyan û daristanên wan şewitîn. Her wiha gelek zîndewerên kovî di nav şewetê de mirine. Ji mîroyan em bigirin heta kîvroşkan hêlînên xwe di nav zevî û axê de çêdikin. Ango encama agirê ku dilê me jî şewitand gelekî mezin e.
Bi destpêka agir re hawar û qêrîna gundiyan li tevahî Kurdistanê û Tirkiyeyê belav bû, lê mixabin bersiva hawara gundiyan ji hêla kurdan ve jî dereng hat bihîstin. Ji xwe çapemeniya raya giştî û beşeke nijatperestên tirk nexwestin hawar were bihîstin û kêfa wan ji şewata Kurdistanê re hat. Erkdar û rayedarên dewletê, xwe di malên xwe de pîs kirin heta ku agir bi malên gundiyan ket.
Rojekî hevalekî min ji min re çîroka xwe û kurê xwe anî ziman: Kurê wî dema ji nav bajêr vedigere mal, rê de lingê wî li kevirekî dialike û dikeve. Dema digihîje mal, bavê wî dibêje çima tu ew qas lewitî? Ew jî dijûna dike dewletê û dibêje, ez ketim. Bav difikire û dibêje ma çima tu dijûna dikî dewletê? Kur dîsa dijûna dike dewletê û dibêje, sedema ketina min dewlet e!
Li gorî vê çîroka bav û kur jî em lê binêrin, di rastiyê de sedema her tiştî di nav welatekî de biqewime berpirs; rayedar û erkdar in! Ango kî çi bêje bile bibêje sedema agirê ku welatê me dişewitîne dewlet bi xwe ye!
Her sal wekî agirê îsal, agir bi daristan û zeviyên welatiyan dikeve. Wê demê divê gele kurd bi derfeta xwe bi xwe, çi bike?
Amadekariya Agirvemirandinê
Ji vî agirê ku dilê gelê kurd êşandî, divê gelê kurd û berpirsên gelê kurd şîretek baş ji xwe re jê derbixe û amadekariya xwe ya ji bo agir vemirandinê baş bike. Gelê kurd xwe li benda saziyên dewletê û teknîka wan ve bihêle dê her û her winda bike.
Hewce ye; li heremên ku çandinê lê tê kirin û daristan lê hene saziyên xwezaperest werin ava kirin û hişmendiya xwezaparastinê di nav gel de belav bikin û gel xwe bi xwe li xwezaya xwe xwedî derkeve.
Şaredariyên heremê divê li ser vê mijarê rawestin û di vî warî de bibin xwedî hêz û amadekarî. Hewce ye di bin banê her şaredariyê de bi teybetî demsala havînê teknîka agir vemirandinê amade be û Beşa Agirvemirandina Şaredariyên heremê; her roj zevî û daristanên welat kontrol bike. Her Şaredariyên bajarên Kurdistanê, dikarin bi rêya înternet û teknîka pêşketî her roj herema xwe kontrol bike. Dema bibînin çirûskek li nav zeviyeke an jî li daristaneke pê ket, demildest pêve biçe û hêj agir belav nebûyî bitemirîne.
Mixabin niha dema agir gur dibe û bi hawara gundiyan tê bihîstin, heta teknîka Agirvemirandina Şaredariyan pêve diçe, agir har dibe û gelek windabûn rû dide. Welatî bi terektorên xwe hewl didin agir bisekinînin û ev jî nikare pêşiya agirekî gur bigire. Bo vê çendê hewceye teknîkeke baş û demildest pêşî li agir bigire.
Her wiha şaredariyên kurdan dikarin ji bo xwezaparastinê yekîtiyeke hevpar ava bikin û di rewşên awarte yên ji xwezayê pêk tên de kordînekeye baş bikin û hêzeke mezin derxin pêş. Ev yekîtiya ji bo parastina xwezayê dikare heta teknîka hewayî jî amade bike û karekî serkeftî bimeşîne.
Rastiyeke berbiçav e ku heke di derbarê mijarekî de mirov ne xwedî têgihîştin û amadekarî be çi biqewime mirov nikare encameke bi dilê xwe jê derbixe. Bo vê çendê hewce ye ji bo xwezaparastinê şaredariyên me demildest xwedî proje bin.
**
Nûçe û nivîsên li ser şewatê:
- Li ser şewata Çinar-Şemrexê du agahiyên nû
- Agir bûye bûkaniyeke sor ji bejna welatê min re
- Bakirhan: Bila herêm wekî 'herêma afetê' bê qebûlkirin
- Konseya Amedê pêşrapora li ser şewatê belav kir; va ye bilanço
- Hejmara kesên mirin derket 12'an; va ne navên wan
.jpg)
