Emê vê carê li ser du fîlmên du derhênerên kurd bisekinin. Her du jî di çarçoveya 38'emîn Festîvala Fîlman a Navneteweyî ya Stenbolê (5-16 avrêl 2019) de hatin nîşandayîn.
"AETHER"
Fîlmê pêşî belgefîlmekî ye bi navê "Aether". Derhêner Rûken Tekeş li Heskîfê, li ser Heskîfê kişandiye. Bêyî diyalog hebe berê kameraya xwe daye Heskîfê, av, hewa, bajar, sewal û hwd...
Kamera radiweste, demek dirêj radiweste, temaşevanan guherîna li wê derê dibîne, dibe şahid. Xweza dixuye di wir de, jiyana di nav xwezayê de... Dîmen dirêj in, carinan ev dirêjî mirovan aciz jî dibe lê axir terciha derhêner e û derhêner jî dibêje ku wê wisa hilbijartiye. Heta vir her tişt temam e.
Hema li welatek dinyayê kesekî/e li vî belgefîlmî temaşe bike dê rabe li çepikan de ji ber ku guherîna di nav xwezaya wir de li ber çavên xwe dibîne, dibe şahid. Lê tiştek din heye: Ev der Heskîf e û bi sazkirina bendava Ilisû re ev xweza, ev jiyan, ev giyanewer, hemû sewalên li wir dibin avê de dimînin û têk diçin. Belgefîlmî, yanê derhêner qet nebe bi peyvek jî di dawiya belgefîlm de qala vê têkbirinê nekiriye. Bi diyarnekirina tiştek wisa re belgefîlm bêwate dibe. Ji ber ku ji aliyek ve ev xwezaya xweş, jiyana li nav wê xwezayê tê kişandin, tê pêşkêş kirin lê li aliyê din yên temaşe dikin û dê temaşe bikin dê nizanibin niha bendavek li ser wir tê çêkirin û ev xweşikî hemû tê têkbirin, tê qetilkirin...
KUNYE:
AETHER
Derhêner: Rûken Tekeş
Derhênerên dîmenê: Ute Freund, Deniz Eyuboglu Aydin, Merle Jothe, Andres Lizana Prado
Vesazkirin: Marco Spoletini, Rûken Tekeş
Muzîka Taybet: Diler Ozer, Metehan Dada
Sala kişandinê 2019, 82 deqîqe
"GORULMUŞTUR"
Fîlmê me yê duyem fîlmê "Gorulmuştur" ("Hatiye Qontrolkirin") ê derhêner Serhat Karaaslan e. Karaaslan ku heta niha bi kurtefîlmên xwe bal kişandibû bi yekem fîlmê xwe yê metrajdirêj li pêşberî me ye.
Li girtîgehan girtî dema nameyek dişînin derve, yan jî ji derve nameyek ji bo wan tê komîsyoneke ji peywirdarên girtîgehê heye, van nameyan dixwîne û piştî mohra "Gorulmuştur" lê dide wê nameyê teslîm dike. Endamên komîsyonê ger tiştek ne rast bibînin ser wê xêz dikin, yan jî nameyê nadin girtî/kesê/a jêre hatiye şandin. Serlîstikvanê fîlm jî yek ji wan peywirdar e û fîlm wisa dimeşe.
Li girtîgehan girtî dema nameyek dişînin derve, yan jî ji derve nameyek ji bo wan tê komîsyoneke ji peywirdarên girtîgehê heye, van nameyan dixwîne û piştî mohra "Gorulmuştur" lê dide wê nameyê teslîm dike. Endamên komîsyonê ger tiştek ne rast bibînin ser wê xêz dikin, yan jî nameyê nadin girtî/kesê/a jêre hatiye şandin. Serlîstikvanê fîlm jî yek ji wan peywirdar e û fîlm wisa dimeşe.
Karaaslan fîlmekî sade, xweş kişandiye. Jixwe ji ber vê jî di festîvalê de di pêşbaziyê de bû û ji festîvalê Xelata Senaryoya Herî Serketî girt (Piştî Stenbolê li Festîvala Enqereyê jî hat nîşandayîn û Xelata Fîlmê Serketî ya Siyadê girt). Belkî mirov dikare bibêje dikaribû hinek din balê bikişîne ser girtiyên kurd ku tê zanîn ev name piranî ji wan re çûne/diçin û her peyvên wan têne sansurkirin... Dikaribû yek ji karakteran jî nameyek bi kurdî bişîne û kêliyên wisa jî têde heba. Lê axir fîlmekî xweş li pêşberî me ye.
Ji gelek fîlmên min li festîvalê temaşe kirin didu jî ev bûn. Her çiqas rexneyên me hebin jî hêjayî temaşekirinê ne bi taybetî "Gorulmuştur"... Ger li cihek nîşandayîna wan hebe pêşniyar e lê temaşe bikin...
KUNYE:
GORULMUŞTUR
Derhêner/Senaryo: Serhat Karaaslan
Derhênera Dîmenê: Meryem Yavuz
Vesazkirin: Ali Aga
Lîstikvan: Berkay Ateş, Saadet Işil Aksoy, Fusun Demirel, İpek Turktan Kaynak, Erdem Şenocak, Mufit Kayacan, Banu Fotocan
Sala Kişandinê: 2018, 95 deqîqe
.jpg)
