Ma tûtî bî. Zey enkay a çaxî jî sere ra reyke Remezan hameyne.
Ma tûtî bî, bi a tûtî xo ma jî waştêne roce bigirî la rocey ma heta nîmerojke dewam kerdêne; çimkî encax ma endêke debar kerdêne.
Ma tûtî bî, ma Remezan ra hez kerdêne; semedo ke dimay Remezanî roşan hameyne û her roşan de babê ma marê cilê newey girotêne. Lastîgê newey, pantolê newey, gomleko newe...
Ma tûtî bî û ma roşan ra hez kerdêne, nê tenî qeybî ke pîlanê ma marê cilî girotê ne, roco roşanê Remezanî marê antişê (şimitiş) cixare jî serbest bî. Qet û qet pîlan nêverdayne tûtî cixare bancê. Antişê cixaran qeybî tûtan çîqew eyb bî. Fek tûtaran verade, qeybî xortan jî antişê cixara eyb bî, la roco roşan heta dimay nîmerocke ma tûtanrê antişê cixare serbest bî.
Ma tûtî bî û di enî Remezanî de verî ke roşan bêro bi hefteyan ma cilê xo jî, cixarey xo jî kerdêne hedre. Û serê sibay roşanî, verê camî de ezman dûy cixarey ma ra niyameyne heysayişî. La bîne dimay nîmerojke, yan jî roco bîn cixara reyna qedexî bî. Ê ke hema cixareycê mendîbî yan eyştêne, yan jî waştê wedaro heta roşanênan.
Ma tûtî bî, di enî Remezanî de ma jî şîne verê camî, verî ke melay şanî azan bido ma hameyne têhet û pîlan marê qalê başî û xirabî kerdêne.
Ma tûtî bî û mara hameyne vatişî ke gere Remezan de merdim jobînî rê baş bo. Merdim nêdo pêro, ger neyarî miyanê însanan de jî bibo gere bêro wedartişî.
Ma tûtî bî û qet rojekê joy mara nêvat Remezan de jî însanî yenê kiştî.
La ma bî pîlî.
Remezan reyna eynî Remezan o. Reyna yeno, reyna şino, la pêrodayîş nêqedêno. Kiştiş jî.
Vizêrî (yanê rojo 12.07.2015 de) eskeranê tirkan dewey Gundikê a Golana Erdexanî de gule veraday erebeyke sivîl. Di erebe de xaloyke extiyar, ê 70 sere Kamber Morkoç merd, di tenî jî birîndar bî.
Erê enka Remezan o, la ew Remezanê ma yê tûtinan niyo. Wexto min xeberey kiştiyê xalo Kamber Morkoçî şinawite roco Remezan û Remezanê tûtîtî min hame min vîr.
Erê ma bî pîlî, di enî Remezanî de jî merdimê ma yenê kiştişî.
Reyna ma tûtî bî û pîrikêke wexto nisîbetêke viraziyay ne vatê: "Homa heqê biza qole, ya qiloçinerê nêverdeno." De nêza, înşela rast o.
Homa xalo Kamber Morkoçî bi rehmey xo şa bikero, aramî bido nas, dost û merdimanê ê.
.jpg)
.jpg)
