Diyarname
Berendamê Serokomariyê yê HDP'ê Selahattin Demîrtaş mafê xwe yê axaftina 10 deqe ya di TRT'ê bikar anî û saet 20.40'ê vê êvarê bi ser ekranê re xwe gihand bi mîlyonan.
Li meydana Bazara Bakirkoya Stenbolê ku mîtinga HDP'ê hebû, li qehwexaneyan, li malan bi mîlyonan kes li benda vê axaftina Demîrtaş bû. Demîrtaş bi silav dayînê dest pê kir, qala girtina xwe û 12 mebûsên HDP'ê ku hê girtîne kir û got: "Ji ber ku ji me ditirsin em li vir in. Her derew û buxtanan li me dikin. Bila bizanin, wekî Seyîd Riza gotiye 'Min nikarî bi we ev ji bo min bû derd, lê min li hemberî we serî netewand bila ev jî ji bo we bibe derd', lê ezê bikaribim bi  derewên we jî."
Demîrtaş got ku biryara ku hûn bigirin, ji bo pêşeroja me, ji bo zarok û nevîyên me muhîm in û got: "Bi qasî mohrek canê wan heye. Hûnê biryarê bidin; hûnê vê firsendê baş bikar bînin û welat ji ber kendal bi paş ve vegerînin, hûnê nîşan bidin ku gel kî ye. Hûn dengê xwe bidin, wekî din ji me re bihêlin, paşê binêrin ew qebedayiyê sexte dikeve çi şiklî. Di vir de bi taybetî ez bi ciwanan û jinan bi hêvî me."
Demîrtaş ji Hallaci Mansur heta Deniz Gezmiş, ji Mazlum Dogan heta Sêx Seîd, ji Yilmaz Guney heta Ahmet Kaya navê gelek berxwedên di dîrokê de anî ziman û paşê got: "Tekane sedema ku min li vir digirin ew e ku AKP ji min ditirse, lê bila bizanin ne 20 meh 20 sal min di hucreyê de bihêlin jî ezê ber xwe bidim."
Demîrtaş got ku hûn baş bin ez ê jî baş bim, hûn azad bin ezê jî azad bibim û wisa lê zêde kir: "Em tov in têne çandin û dîsa tên, em genim in bên eciqandin jî dibin ar û tên. Loma em dibêjin dengek ji bo Demîrtaş, dengen ji bo HDP'ê."
Demîrtaş di dawî de rexne li TRT'ya ku qet cih nade wî jî kir û ew rexne kir.