AMED

1'emîn Kongreya Jinê bi beşdariya 501 delegeyan û gelek jinên din ên cihanê dest pê kir. Di kongreya ku dê du rojan dom bike de dê stratejiya nû û şiklê rêxistinê bê nîqaşkirin.

Tevgera Jinên Azad a Demokratîk (DOKH) yekemîn car kongreya xwe li dar dixe. Kongreya ku li Amedê li dar ket de wêneyên Sakîne Cansiz, Fîdan Dogan, Leyla Şaylemez, Arîn Mîrkan, Denîz Firat, Kader Ortakaya, Zeynep Kinaci, Sema Yuce, Ayşe Şan, Zarîfe, Leyla Qasîm û wêneyên Xwîşkên Mîrabel li salonê hatin daliqandin. Her wiha pankarta "Em bi jina azad ve netewa demokratîk saz dikin" hat daliqandin. Bi destpêkirina kongreyê re sînevîzyona ji wêneyên Rêberê PKK'ê Abdullah Ocalan hatibû sazkirin hat nîşandayîn.

Hevseroka PYD'ê Asya Ebdullah, ji Kantona Efrînê Endama Yekîtiya Star Vahîde Mihemmed Xelîl, Wezîra Ragihandina Kobanî Şervîn Mehmûd, Ji RJAK'ê Sîna Kerîm, ji jinên êzdî Meryem Baba Şêx, Endama Tevgera Azad Emîne Mihammed Îsmaîl, Parlementera Avusturya Berîvan Aslan, Nûnera Meşa Jinan a Cîhanê (DKY) a Ereb û Rojhilata Navîn Souad Mahmoud, Ji Tunusê Prz. Basma Belaid, Parlementera ANC'ê Vuyîwe Hanî, Parlementera Katalan Îsabel Valet, Rêxistina Ciwanan a SYRÎZA, wekîlên HDP'ê yên jin, hevşaredarên DBP'ê ên jin, Hevseroka KCD'ê Selma Irmak, Hevseroka Giştî ya DBP'ê Emîne Ayna, akademîsyen Nuket Sîrman, Nazan Ustundag, Ji Dayîkên Şemiyê Cemîle Akgun, Sakîne Guven, Hevseroka Giştî ya KESK'ê Şaziye Kose û gelek jin tevlî kongreyê bûn.

Dema Hevseroka PYD'ê ket salonê diruşma "Bijî YPJ" hate bilindkirin.

Hevseroka PYD'ê Asya Ebdullah di kongreyê de axivî û got ku ger jin bi rêxistin bibana dê komkujiya êzdiyan li Şengalê pêknehata. 

Ebdullah got ku bi hezaran jinên kurd li hemberî planên qirêj ên pergalê têkoşîneke mezin didin meşandin û wiha dom kir: "Em ji vir silavan ji bo hemû jinên berxwedêr dişînin. Em Kongreya Yekemîn a Jinê bi ser keda jinê û berxwedana wan re pêş dixin. Civana kurd ji bo hemû jinên dinyayê îro pêşengî kir. Jin li hemberî pergalên paşverû li Kobanî, li Kerkûkê, li Şengalê têkoşîna xwe bilind kirine. Ger hêza parastinê ya jinê tune be em nikarin qala siyaset, edalet û azadiyê bikin. Jin îro dîroka xwe ji nû ve dinivîsin. Ev dîrok dîroka bi hezaran salan a jinê ye. Ev dîroka jinên can dane berxwedanê, jinên di fabrîqeyan de yewitîne, dîroka jinên ji îşkenceyan derbas bûne ye."

Ebdullah xwest hemû jin di bin banê kongreyê de bên ba hev û wisa dawî li axaftina xwe anî. "Gere em hemû jinan perwerde bikin û wan ligel nasnameya wan bigihînin hev. Li ser vê esasê em kongreya me pîroz dikim û sozê didin ku emê li ser rêça şehîdên xwe bimeşin."

Kongre bi axaftinan didome. Sibê dê kongre bi dawî bibe. 

  Asya Ebdullah ku li Kobanî di nav berxwedêran de bû di kongreya DOKH'ê rastî eleqeyeke mezin hat.