Cemil Oguz / AMED
TUYAP'ê piştî lidarxistina 5 fûarên Amedê biryar da ku îsal fûarê li dar nexe. Li ser vê yekê weşanxaneyên kurdan, Komeleya Nivîskarên Kurd, Şaredariya Bajarê Mezin a Amedê ketin nav tevgerê. Di dawiyê de biryar dan ku vê gulanê ew bixwe fûarê li dar bixin. Fûarê roja 12'yê mehê dest pê kir û heta 17'ê mehê didome. Ez 15'ê mehê serê sibê li wir bûm heta êvarê (helbet heta dawî ezê li fûarê bim) û vane notên min ên rojekê:
- Li fûarê du salon hene, yek mezin e; ew zêdetir li pêş e, yek aliyê paş e û hê biçûktir e.
- Îdîa ew e ku ligel ku yekem car e li dar dikeve jî organîze baş hatiye kirin; min jî wisa hîs kir.
- Hemû weşanxaneyên kurdan ên li Bakur û ên li metropolên Tirkiyeyê beşdarî fûarê bûne, stand vekirine. Hin weşanxaneyên tirkan jî stand vekirine.
- Ji saziyên sivîl ên kurdan ên wekî Kurdî-Der, Komeleya Nivîskarên Kurd, DÎSA, Weqfa Îsmaîl Beşîkçî û hwd. jî stand vekirine.
- Ji kovarên kurdan, Kurd Tarîhî, Wêje û Rexneyê jî stand vekiriye.
- Ji weşanxaneyan cihê herî baş dane Nûbiharê. Cihek mezin û hema li pêş deriyê kes dikevin hundir.
Dengê kurdî serdest e
- Li gor weşanger dibêjin ji bilî roja ku baran barî ye bi giştî ji aliyê eleqeya xwendevanan ve fûar baş derbas bûye. Li bendê de ku dawiya hefteyê, yanê her du rojên dawî baştir derbas bibin.
- Ji dema TUYAP'ê cudatir wisa dixuye yên tên fûarê eleqedarê pirtûkan in.
- Ji TUYAP'ê cudatir li salonê ne tirkî, kurdî serdest e.
- Hema li standa her weşanxaneyê nivîskarek, an hin nivîskarên kurd pirtûkên xwe îmze dikin.
- Anonsa îmzekirina pirtûkan a navên nivîskaran û anonsa panelan her bi kurmancî û kirmanckî (zazakî) tê kirin; kêm caran bi tirkî tê kirin.
- Her roj gelek panel û gotûbêj hene. Ji bilî hinên kesên navdar bi giştî eleqeya temaşevanan ji bo panelan kêm e.
Zarokên Kobanî
- Zarokên Kobanî îro mêvanên fûarê bûn; hatin geriyan, li çepikan dan, hinan bi wan re wêne kişandin û ew çûn.
- Fûar li Sumer Parkê ku qadeke fireh a bi dar û ber e, gelek kes piştî fûarê, yan berî fûarê li wê derê bêhna xwe jî didin.
- Karek wan hebe, nebe hema bibêje hemû nivîskarên kurd ên li Amedê îro li fûarê bûn û me hev dît. Mirov dikare bibêje ji aliyê hatine nivîskarên Amedê ve pirsgirêk nîn e.
- Di rojekê de panela Celîlê Celîl, ya Mesûd Serfiraz (bi ya min ev balkêş bû, di serdema Osmanî de weşangeriya kurd) û gelekên din jî hebûn. Li ser zêdetirina eleqeya ji bo panela û gotûbêjan divê xebatek baştir bê kirin.
Pêşbaziya Arjen Arî
- Di çarçoveya fûarê de merasimek ji bo 2'yemîn Pêşbaziya Helbestan a Arjen Arî li Salona Merasimê hat lidarxistin. Îsal Yahya Omerî bi dosyaya xwe bû yekemîn. Omerî xelata xwe ji destê helbestvan Berken Bereh girt. Her wiha ji bilî vê xelatê, îsal Xelata Rûmetê dan kesek ku ne kurd lê gelek keda wî ketiye nava kurdî; ew jî karsaz Osman Kavala bû. Kavala xelata xwe ji destê Hevşaredarê Bajarê Mezin ê Amedê Firat Anli girt û sipasiyeke ji dil kir.
Lawje li ser dikê bû
- Ji bilî çalakiyên li fûarê, her roj konser an guhdariya muzîkê jî heye. Êvarê konsera koma Lawje hebû. Li Amfiya ku tije bûbû de Lawjeyê ji Culemêrgê deng û renga kurdî bi muzîk û şiroveyeke bi coş pêşkêşî temaşevanan kir û roj bi coş bi dawî bû.
Panela Diyarnameyê
- Du rojên dawî, 16 û 17'ê mehê jî dê fûar bidome, mêvan dê bên fûarê. Her wiha çalakî, gotûbêj û panel jî dê dîsa li dar bikevin. Yek ji wan jî panela Diyarnameyê ye. Panela Diyarnameyê di çarçoveya çalakiyên 10 Saliya Diyarnameyê de hatiye organîzekirin. Panela bi navê "Di warê pirtûk û zimanê kurdî de rola malperên kurdî" dê 17'ê mehê roja yekşemê saet 15.00'an de li dar bikeve. Rojnameger Cemil Oguz û Zekî Ozmen dê li ser meseleyê biaxivin û Zulkuf Kişanak jî dê moderatoriya panelê bike.
**
Nûçeyên eleqedar:
.jpg)
