Tayîp TEMEL

Me bi xemgînî bihîst ku Serokê Berê yê DEHAP’ê Mehmet Abbasoglu ji ber nexweşiya penceşêrê ya giran rakirine nexweşxaneyê û dema ev nivîs dihat nivîsandin jî xebera wefata wî gihîşt me. Di nava vê atmosfera hilbijartinê de nûçeyên nexweşiya wî dibe ku pir li paş mabe lê bi taybetî jî di vê pêvajoyê de siyaseta kurd a demokratîk li ber ked û xwêdana Abbasoglu deyndar e. Lewre jî divê ew lehengê nepenî her tim bê vegotin. Siyaseta kurd divê di vî warî de bi nan û xwê be.

***

Mehmet Abbasoglu di nav siyaseta kurd de naveke girîng e û xwedî taybetmendiyên balkêş e. Ew yek ji wan siyasetmedaran e ku demeke dirêj jî di nava artêşa tirk de ma û dîsa ji pirsgirêka kurd û hebûna kurd agahdar bû. Tê zanîn ku yek ji şertên artêşa tirk ew bû ku peywirdarên wê bawerî bi înkara hebûna kurd bînin. Lê Abbasoglu bi taybetî jî di nava artêşa tirk de rastiya kurd nas kir û berê xwe da wê heqîqetê. Di pêvajoya herî girîng û dijwar de bê fikar berpirsyariyên girîng dan ser milên xwe. Tu carî li benda mewkî û meqaman jî nema. Tê zanîn ku salên 1997’an ji bo siyaseta demokratîk a kurd salên herî dijwar bûn. Tu serokên partiyan nemabûn ku nehatibûn girtin û gelek caran ew rastî êrîşên kontrayî hatin.

***

Di wan salan de Mehmet Abbasoglu di avakariya Partiya Demokrasiya Gelan (DEHAP) a ku wekî şopdara HEP, DEP û HADEP’ê dihat pênasekirin de cihê xwe girt. Hemû kes dizane ku Serokatiya DEHAP’ê wan salan barekê giran bû û cara ewilî wî ev bar girt ser milên xwe. Ji ber doza ku lê hat vekirin demekê wekî serokê vê partiyê di girtîgehê de ma. Taybetmendiyeke din a wî hebû ku tu carî tenezulî meqaman nekir û ev tişt ji Tevgera Siyasî Kurd jî daxwaz nekir. Hema bêje di nava siyaseta kurd de tu peywira ku ket ber wî bê dudilî bi cih anî. Abbasoglu salên dirêj di nava xebatên Rêveberiyên Herêmî de cih girt û di sazkirina Yekîtiya Şaredarên Kurdistanê de roleke gelek çalak lîst. Jixwe ji ber vê xebata xwe ew bû hedefa dewletê. Lewre jî di çarçoveya operasyonên qirkirina siyasî yên bi navê KCK’ê de di 14 Nisana 2009 de tevî 53 siyasetmedarên kurd hat girtin. Ji ber temenê wî yê zêde û pirsgirêkên wî yên tenduristiyê, şert û mercên girtîgehê pirsgirêkên saxlemiyê girantir kirin.

Tê bîra min ku dema di girtîgehê de bû, tu caran behsa nexweşiya xwe nedikir û li hemberî dadgehên bêedalet serê xwe netewand. Lê em hemû jî dizanin ku astengiyên li ber tedawîkirina wî bûn sedem ku nexweşiya wî ya penceşêrê girantir bibe. Piştî 5 salên zindanê di 12’ê nîsana 2014’an de ew û 47 hevalên xwe hatin tehliyekirin lê ew doz hîn jî didome. Me hêvî dikir ku ew pişta vê nexweşiyê jî bişikîne lê mixabin… Oxir be lehengê nepenî yê siyaseta demokratîk a kurd.

**

Têbiniya Diyarnameyê: Mehmet Abbasoglu roja 05.06.2015 wefat kir. Ev nivîs roja 6'ê mehê di Azadiya Welat de hate weşandin lê ji ber xirecira hilbijartinê li pişt perdeyê ma. Ji bo bîranîna Abbasoglu em careke din vê nivîsê diweşînin û em hêvî dikin dê Xwedê wî bi rehma xwe şa bike.