Diyarname

Televîzyona alman a bi navê ZDF êvara 30'ê mehê bi awayekî yekser ligel Hevserokê HDP'ê Selahattin Demirtaş hevpeyvînek kir. ZDF duyemîn televîzyona fermî ya alman a mezin e. Di hevpeyvîna ku 10 deqe dom kir de Demirtaş li ser pirsên di rojevê de bersiva tv'yê da. Vane hin notên ji wê hevpeyvînê:

- Tu têkiliya me û PKK nîn e, vê yekê herî baş birêz Erdogan dizane. Ew bi ser min re polîtîkayeke qirêj dimeşîne, nêrînek wisa çêdike, nîşan dide wekî ku em bi xwe biryarên xwe nadin. HDP ji kesî fermanê nagire, li gor fermanên kesî tevnagere.

- HDP dixwaze aştiyê saz bike, azadiyê saz bike û xurtir bike. Tu têkiliya HDP'ê bi tu bûyera şîdetê re nîn e. Me her demê xwe ji şîdetê dûr girtiye..

- Em tekane partî ne ku dikarin bi Îmralî, Qendîl û Enqereyê re hevdîtinê çêbikin. Em dixwazin vê biparêzin, gere rêyên têkiliyê neyên girtin.

- Dixwazin me ji wekî alîgirê terorê, alîgirê şîdetê nîşan bidin ku sedî 13 dengên ku me girtine ma ji wir daxin, bixin bin bendavê û bi vî awayî bi tena serê xwe bibe desthilatdar û bigihîje armanca xwe ya serokdewletî. Ev ne mimkûn e ji ber ku êdî civaka Tirkiyeyê wekî salên 90'î tenê ji yek çapemeniyê agahiyan nagire.Hemû çapemeniyê bigirin bin kontrola xwe jî ji ber ku dê nikarin çapemeniya civakî kontrol bikin, em dikarin rastiyan ji bo gel vebêjin û emê vebêjin jî.

- Niha şerê ku AKP'ê û birêz Erdogan daye destpêkirin ne şerê parastina welat e. Tirkiye welatê me yê hevpar ger di bin tehdîdê de ye em hemû bi hev re amade ne biparêzin, lê ev ne parastina welat, parastina Qesrê ye. Yanê ev şerê parastina birêz Erdogan a ji bo parastina kursî Qesra xwe ye. Divê di vî şerî de zarokên kurd û tirk nemirin, ji bo vê yekê jî HDP divê xurtir û mezintir bibe. 

- Her ku HDP xurt bibe dê AKP lawaz bibe, her ku AKP lawaz bibe dê şer û çek bisekinin. HDP xurt bibe îhtîmala bikaranîna çekê ya ji aliyê PKK'ê ve dê kêmtir bibe.

- Tirkiye li hemberî rêxistina hov, qatil bikeve nav tevgerê tiştek muhîm e, em dê piştgiriya vê yekê bikin. Tirkiye divê bi awayekî xurt vê yekê bike, lê çiqas dike em ne bawer in. Heta demek kurt jî em dizanin ku bi awayekî têkiliya Tirkiyeyê bi DAIŞ'ê re hebû. Raste rast, an neraste rast piştgirî daye DAIŞ'ê, em vê dizanin.

- Ger Tirkiye bi awayekî xurt li dijî DAIŞ'ê tevbigere rêya wê ne ew e ku ji DAIŞ'ê zêdetir operasyona hewayî li hemberî PKK'ê pêk bîne. Bi ya me tiştê rast Tirkiye di cih de ligel PKK'ê aştiyê îmze bike û ligel PKK'ê li hemberî DAIŞ'ê hê bi bandortir şer bike. Gere hêzên navneteweyî yên Koalîsyonê bikevin nava tevgerê. Ji ber ku PKK û hêzên nêzî PKK'ê li bejayî têkoşîna herî bi bandor li hemberî DAIŞ'ê didin. Tu wateya wê tuneye ku Tirikye DAIŞ û PKK bixe neman astê û li hemberî wan tevbigere, lewma Tirkiye ligel PKK'ê aştiyê çêbike hem ji bo Tirkiyeyê hem ji bo herêmê dê baş be. Gere Amerîka û hêzên din jî vê rastiyê bibînin û li gor vê yekê tevbigerin.

Vaye temamê hevpeyvînê:
ZDF-DEMÎRTAŞ