Diyarname

Mebûsên HDP'ê yên Rihayê Osman Baydemîr, Îbrahîm Ayhan, Leyla Guven, Dilek Ocalan, Ziya Çalişkan û 20 mebûsên HDP'ê li ser teslîmkirina 6 YPG'yiyên ku dewleta Tirkiyeyê ew teslîmê El Nusra kirin xwest Meclis lêpirsîa Sûcê Şer bide dest pê kirin.

Mebûsan di pêşniyarnameya xwe de wisa gotiye: "Roja 25'ê tîrmeha 2015'an dema ji bo dermankirinê 6 hemwelatiyên Sûriyeyê li mêvanxaneya Egîtîm-Senê bûn li Enqereyê polîsan bi ser wirde girtiye û ew girtine bin çavan. Ahmet Şerko, Omer Qadir, Reber Şêxo, Ehmed Helum, Cemal Ehmed û Beşîr Mihemed ji aliyê Midûriyeta Şaxa Têkoşîna bi Terorê re ya Enqereyê ew girtine bin lêpirsînê û paşê Serdozgeriya Komarê ya Enqereyê ew serbest berdane. Piştî ew hatine berdan bi kiryareke dijî hiqûq û ehlaqê ew ji deriyê sînor ê Cîlvegozu re teslîmê El Nusra kirine ku ev rêxistin di nav lîsteya terorê ya Tirkiyeyê de ye û ji aliyê dinyayê ve jî wekî berdewaa El Qaîde tê zanîn. Mixteşarê Wezareta Karên Derve ya Tirkiyeyê ev agahî bi gotin daye wekîlên koma me. Hê jî kes bi aqûbeta van 6 kesan nizane."

Di pêşniyarnameyê de hatiye gotin ku ev 6 kes bi daxwaza xwe ji rêyên hiqûqî re hatine Tirkiyeyê lê teslîmkirina wan a herêmek ku ewlehiya canê wan nîn be sûc e. Pêşniyarname wisa didome: "Bi ser de jî ne ji deriyê Nisêbîn-Serêkanî-Pirsûsê re ji deriyê Cîlvegozu re şandine ku ew der neyartiya van kesan dike, ew teslîmê rêxistina terorê El Nusra kirine. Ev yek nîşan dide ku bi vê kirinê bi awayekî eşkere hiqûqa neteweyî, hiqûqa navneteweyî, hiqûqa mafên mirovan hatiye binpêkirin."

Mebûsan got ku Tirkiye ji aliyekê ve dibêje ez piştgirî didim penaberan li aliyê din yên hatine vir teslîm dike ku ev yek nanokî ye û xwest ku ji bo zelalkirina bûyerê lêkolîn bê kirin.