Wan
Kesên ku di pêşbaziya li ser navê Feqî Huseyîn Sagniç de ji aliyê TZPKurdî ve hatibû lidarxistin de bi ser ketin xelatên xwe girtin.

TZPKurdî di warê çîrok, helbest û fablê ku ji bo 5'emîn salvegera wegata Feqî Huseyîn Sagniç lidar xistibû bi dawî bû û xelat hatin belavkirin. Ji bo xeladayînê li Salona Dawetê ya Şamdan a li Mavî Plaza ya Wanê merasîmek hate lidarxistin û di merasimê de Serokê DTP'a Wanê Abdurrahman Dogar, Endamê PM'ya DTP'ê Îzzet Belge, Serokê Rêxistina Navçeya Navendî ya DTP'ê Selahattîn Endakçi, Însiyatîfa Dayîkên Aştiyê, YODER, Egîtîm Sen û nûnerên saziyên civakî yên sivîl jî di nav de nêzî hezar û 500 kes amade bûn.

Di şevê de pankartên "Zimanparêzî Welatparêzî ye, bê ziman welatparêzî nabe", "Zimanê me rûmeta me ye em lê xwedî derkevin", "Şêr şêr e çi jin e çi mer e" hatin daleqandin. Sînevîzyonek ku tê de jiyana Feqî Huseyîn Sagniç dihat pêşkêşkirin hate nîşandayîn û dûre dest bi axaftin û xelatdayînan hate kirin.

Serokê KURDÎ-DER'ê Qahir Bateyî got ku ev 80 sal in li ser kurdî asîmîlasyonek qirêj tê meşandin, qala zor û zehmetiyên li ser kurdî kir, gotinên Serokwezîr Erdogan ên ku li Almanyayê kiribûn "Tirk rastî asîmîlasyonê tên û ev sûcek mirovahiyê ye" bibîr xist û got: "Belê, Serokwezîr rast dibêje. Asîmîlasyona bi her awayî, sûcê mirovahiyê ye. Em tevlî Serokwezîr dibin. Lê bila Serokwezîr ji bîr neke ku tewanbariyên li Almanyayê dike, ev 80 sal in ew bi xwe li ser gelê kurd û zimanê kurdan dikin."

Jina Feqî Huseyîn Sagniç Rabîa Sagniç li ser eleqeya mezin kêfxweş bû û diyar kir ku wê ji Stenbolê ji bo Wanê silavên dayikên aştiyê anîne. Rabia Sagniç wisa got: "Li ziman, welat û bajarê xwe xwedî derkevin."

Di pêşbaziyê de van kesan xelat girt:

Çîrok
1) Em ê di Gora Kalikê Wan de Birîn  :Dijwar Uskan
2) Dadweriya Xwedayî    : Şevger Çiya
3) Bextewarî û Mirin       : Azad Ronakbar

Helbest:
1) Dilopek   :Şevger JAKAW
2)  Hebûn û Tunebûn  : Xecê Omerî
3)  Netirsin  : Welat Dilken

Fabl:
1) Merganê :  Rezoyê Osê
2) Daristana Bêqral  : Emin Sarı
3) Mih û Bizin : Idrîs Goksun